कोरबा के सार्थक के इसरो में चयन: 11 ले 22 मई तक मिलही ट्रेनिंग, रॉकेट साइंस के सीखही गुर
ISRO YUVIKA 2026 : कोरबा। भारतीय अंतरिक्ष अनुसंधान संगठन (ISRO) के बड़े कार्यक्रम ‘युविका-2026’ बर कोरबा जिला के पीएमश्री एकलव्य आवासीय आदर्श विद्यालय, छुरी के छात्र सार्थक कंवर के चयन होय हे। छत्तीसगढ़ ले कुल 14 लइका मन ए कार्यक्रम बर चुने गे हें, जेमां कोरबा जिला ले सार्थक अकेला विद्यार्थी हे।
दसवीं के छात्र हे सार्थक सार्थक अभी दसवीं कक्षा में पढ़त हे, फेर ओहा नौवीं क्लास ले ही ए कार्यक्रम बर तैयारी सुरु कर दे रहिस। युविका इसरो के अइसन कार्यक्रम हे जेमां देशभर ले सिरिफ 350 होनहार लइका मन ल चुने जाथे। ए चयन बर आठवीं के नंबर, ऑनलाइन क्विज अउ खेल-कूद जइसन गतिविधि मन ल आधार माने जाथे।
इसरो उठाही पूरा खरचा चयनित लइका मन ल इसरो में दो हफ्ता के ट्रेनिंग दे जाही। ए दौरान लइका मन ल रॉकेट साइंस के नियम अउ रॉकेट लॉन्च ल करीब ले देखे के मौका मिलही। खास बात ये हे कि सार्थक के आए-जाए, रहे अउ खाए-पिए के पूरा खरचा इसरो खुद उठाही।
स्कूल अउ जिला बर गर्व के बात एकलव्य विद्यालय के प्राचार्य असद अहमद ह बताइन कि सार्थक के चयन ले पूरा स्कूल गदगद हे। सार्थक ह घलो खुसी जतावत कहिस कि ओला अंतरिक्ष विज्ञान के बारे में नवा-नवा चीज सीखे बर मिलही। सार्थक के ए सफलता ले जिला के दूसर लइका मन ल घलो आगे बढ़े के प्रेरणा मिलही।
