अब बिना बैंक खाता के घलो लइका मन कर सकिहें UPI ले पेमेंट; गूगल पे ह लाय हे ‘पॉकेट मनी’ फीचर
Pocket Money Feature : नई दिल्ली। डिजिटल भुगतान के दुनिया मा गूगल पे (Google Pay) ह एक अइसन नवा सुविधा लाय हे, जेखर ले अब लइका मन ला अपन सामान बिसाये बर पइसा धरे के जरूरत नई पड़े। गूगल पे ह ‘पॉकेट मनी’ (Pocket Money) नाम के एक नवा फीचर पेश करे हे। एखर सबले बड़े बात ये हे कि अब लइका मन ला यूपीआई (UPI) ले पेमेंट करे बर अपन खुद के बैंक खाता खोले के जरूरत नई हे। ओ मन अपन दाई-ददा के खाता ले सीधा पइसा कटा सकिहें।
का आय गूगल पे के ‘पॉकेट मनी’ फीचर?
ये नवा सुविधा ह ‘UPI Circle’ के हिस्सा आय। जेमा एक ‘प्राइमरी यूजर’ (जइसन कि दाई-ददा) अपन बैंक खाता ले कोनो ‘सेकेंडरी यूजर’ (लइका या घर के कोनो घलो सदस्य) ला पइसा खरचा करे के आजादी दे सकथे। मतलब ये कि लइका ह अपन मोबाइल ले सामान बिसाही अऊ पइसा सीधा ओखर दाई या ददा के बैंक खाता ले कट जाही।
दाई-ददा के हाथ मा रहिही पूरा कंट्रोल
लइका मन कतका पइसा खरचा करथें, एखर ऊपर नजर रखे बर गूगल ह बढ़िया कंट्रोल दे हे। दाई-ददा मन एला दो तरीका ले सेट कर सकथें:
महीना के लिमिट: दाई-ददा ह अधिकतम ₹15,000 तक के लिमिट तय कर सकथें। ये लिमिट मा लइका ह बिना कोनो ले पूछे अपन जरूरत के हिसाब ले पेमेंट कर सकथे।
हर बार मंजूरी: जेमा लइका ह जब घलो कोनो दुकान मा पेमेंट करही, त ओखर दाई या ददा के मोबाइल मा एक मैसेज जाही। जब ओ मन उहां ले ‘OK’ करिहें, तब पइसा कटी। ये ह छोटे लइका मन बर जादा सुरक्षित हे।
कइसे चालू करव ये सेवा?
एला चालू करना बहुत आसान हे। सबसे पहिली गूगल पे के प्रोफाइल मा जाके ‘UPI Circle’ ला चुनव। ओखर बाद लइका के QR कोड ला स्कैन करके ओला जोड़ लेव। फिर अपन हिसाब ले महीना के लिमिट तय कर दव अऊ आधार नंबर डाल के अपन यूपीआई पिन भर दव। एक झन आदमी अधिकतम 5 झन ला अपन खाता ले जोड़ सकथे।
ये नवा फीचर ले लइका मन ला डिजिटल जमाना के जानकारी घलो मिलिही अऊ दाई-ददा मन ला ये चिंता घलो नई रहिही कि लइका ह कतका पइसा अऊ कहां खरचा करत हे।
