एप्पल-गूगल के बड़े लापरवाही; स्टोर में बिकत हे गंदा फोटो बनाय वाला ऐप्स, करोड़ों के होवत हे कमाई
Apple App Store : नई दिल्ली। दुनिया के बड़े टेक कंपनी एप्पल (Apple) अउ गूगल (Google) के सुरक्षा के पोल खुल गे हे। ‘टेक ट्रांसपेरेंसी प्रोजेक्ट’ के नवा रिपोर्ट में खुलासा होय हे कि ये दूनों कंपनी मन के स्टोर में अइसन ऐप्स धड़ल्ले ले चलत हें, जेमन एआई (AI) के मदद ले कोनो भी मनखे के सीधा-साधा फोटो ला अश्लील फोटो में बदल देते हें।
नियम के उड़त हे धज्जी रिपोर्ट के मुताबिक, एप्पल अउ गूगल स्टोर में अइसन दर्जनों सॉफ्टवेयर मौजूद हें, जेखर उपयोग करके कोनो बड़े हस्ती या आम मनखे के फोटो ला खराब करे जा सकत हे। सबले बड़े बात ये हे कि ये कंपनी मन अइसन ऐप्स ला रोके के बदला ओमन ला बढ़ावा देवत हें। जब कोनो यूजर सर्च करते, त ‘ऑटो-कम्प्लीट’ फीचर ह ओमन ला अइसने गंदा ऐप्स तक पहुंचा देते।
कमाई सुन के चकरा जाही माथा आंकड़ा के मुताबिक, अइसन विवादित ऐप्स ला अब तक करीब 48.3 करोड़ बार डाउनलोड करे जा चुके हे। ये ऐप्स ले कंपनी मन ला लगभग 12.2 करोड़ डॉलर (करीब 1022 करोड़ रुपिया) के कमाई होय हे। मनखे मन के सुरक्षा ले जादा ये कंपनी मन ह मुनाफा कमाए में लगे हें।
हटाए के बाद फेर आ गे ऐप्स ये रिपोर्ट में बताय गे हे कि साल के शुरुआत में कुछ ऐप्स ला हटाए गे रिहिस, फेर कुछे महीना में दर्जनों नवा ऐप्स फेर ले स्टोर में वापस आ गे हें। शोधकर्ता मन ह एप्पल स्टोर में 18 अउ गूगल स्टोर में 20 अइसन ऐप्स के पहचान करे हें, जेमन फोटो ले कपड़ा हटाए के दावा करते हें। ये खुलासा के बाद अब पूरी दुनिया में डिजिटल सुरक्षा ला लेके सवाल उठत हे।
