नौनिहाल छात्रवृत्ति योजना : मजदूर मन के लइका मन ला पढ़ाई बर मिलही 10 हजार तक छात्रवृत्ति, गणवेश-किताब बर 2,000 रुपिया अलग से
Nauonihal Chhatravriti Yojana Chhattisgarh : अब पइसा के तंगी के सेती मजदूर मन के लइका मन के पढ़ाई-लिखाई नहीं छूटही। छत्तीसगढ़ सरकार के ‘नौनिहाल छात्रवृत्ति योजना’ पंजीकृत निर्माण श्रमिक (मजदूर) मन के परिवार बर बड़े राहत लेके आई हे। ये योजना म मजदूर मन के पहली दो लइका मन ला ओमन के कक्षा के हिसाब से छात्रवृत्ति के संग-संग कॉपी-किताब, स्टेशनरी अउ स्कूल ड्रेस (गणवेश) बर अलग ले आर्थिक मदद दिए जात हे।
1 हजार ले 10 हजार रुपिया तक मिलथे छात्रवृत्ति छत्तीसगढ़ भवन एवं अन्य सन्निर्माण कर्मकार कल्याण मंडल म जतका घलो मजदूर भाई-बहिनी मन के पंजीयन होए हे, ओमन के पहली दो लइका मन ला कक्षा पहली ले लेके कॉलेज (स्नातकोत्तर) अउ व्यावसायिक कोर्स (प्रोफेशनल कोर्सेज) के पढ़ाई बर 1 हजार रुपिया ले लेके 10 हजार रुपिया तक के छात्रवृत्ति दिए जाथे। एकर संगच, योजना के लाभ पाए वाले हर एक लइका ला स्टेशनरी अउ स्कूल ड्रेस खरीदे बर 2 हजार रुपिया के अतिरिक्त सहायता रासि घलो दिए जाथे।
लइका मन के उज्जल भबिस्य बर सरकार के बड़े कदम ये योजना के असल मकसद मजदूर परिवार के लइका मन ला पढ़ाई के बढ़िया मौका देना हे, ताकि पइसा के कमी के सेती कोनो लइका के पढ़ाई बीच म मत छूटे। सरकार के मानना हे कि शिक्षा ह लइका मन के उज्जल भबिस्य के सबले मजबूत नींव आय, अउ ये योजना उही दिसा म एक बड़े अउ संवेदनसील कदम हे।
अइसन कर सकथौ आवेदन श्रम विभाग ह सबो पात्र पंजीकृत निर्माण श्रमिक मन ला ये योजना के जादा से जादा लाभ उठाए के अपील करे हे। कोनो घलो जरूरतमंद मजदूर भाई-बहिनी मन चॉइस सेंटर, श्रम संसाधन केंद्र, ‘श्रमेव जयते’ ऐप, विभाग के वेबसाइट या फिर बलौदाबाजार कलेक्टर ऑफिस के श्रम कार्यालय (कमरा नंबर 117) म जाके अपन आवेदन जमा कर सकथें।
