LPG Price Hike : पेट्रोल-डीजल के दाम बाढ़े के संग चल्ते घरेलू एलपीजी सिलेंडर के घलोक रेट बाढ़े के कयास लगाय जात रिस। 28 फरवरी के सुरु होय ईरान, इजराइल अउ अमेरिका लड़ई के सेती सप्लाई म दिक्कत आय के बाद घलोक अभी तक घरेलू एलपीजी सिलेंडर के दाम ला नइ बढ़ाय गय रिस, जेन ह अब बढ़ गे हे।

देस म रसोई गैस (एलपीजी) के कीमत म 29 रुपिया प्रति सिलेंडर के बढ़ोत्तरी करे गे हे। दूनिया भर के ऊर्जा बाजार म तेजी के सेती सरकारी तेल कंपनी मन ला लगातार चुनौती के सामना करना पड़त हे, जेकर सेती तीन महीना म ये दूसरी पइत दाम ला बढ़ाय गे हे। उद्योग से जुड़े लोगन मन के मुताबिक, दिल्ली म 14.2 किलोग्राम वाले एलपीजी सिलेंडर के कीमत आज (7 जून) ले 913 रुपिया ले बढ़के 942 रुपिया हो जाही।

पश्चिम एशिया म लड़ई के सेती दूनिया भर म ऊर्जा के सप्लाई प्रभावित होय हे अउ अंतरराष्ट्रीय स्तर म ईंधन के कीमत बाढ़े हे। एकर पहिली 7 मार्च के घलोक 60 रुपिया प्रति सिलेंडर बढ़ाए गय रिस, जेकर बाद ये दूसरी पइत दाम बाढ़े हे। सूत्र मन के कहना हे कि ये नवा रेट लागू होय के पहिली सरकारी तेल कंपनी मन ला हर एक एलपीजी सिलेंडर बेचे म करीब 703 रुपिया के घाटा होत रिस।

कमर्शियल सिलेंडर के घलोक बाढ़े रिस दाम

असल म पेट्रोल-डीजल के रेट बाढ़े के बाद ले रसोई गैस के दाम बाढ़े के डर सतावत रिस। लड़ई के सेती सप्लाई म दिक्कत के बाद घलोक घरेलू सिलेंडर के दाम ला नइ बढ़ाय गय रिस, हालांकि सरकार ह 1 मई के कमर्शियल एलपीजी सिलेंडर के दाम म बढ़ोत्तरी करे रिस। कमर्शियल सिलेंडर 993 रुपिया अउ 5 किलो वाले सिलेंडर म 261 रुपिया बढ़ाए गय रिस। एकर बाद 1 जून के कमर्शियल सिलेंडर ह 42 रुपिया अउ महंगा हो गे रिस।

सप्लाई म नइ हे कोनो दिक्कत

एलपीजी गैस सिलेंडर के सप्लाई ला लेके पेट्रोलियम अउ प्राकृतिक गैस मंत्रालय ह साफ कहे हे कि सप्लाई बिलकुले सामान्य हे। संकट के बाद घलोक कोनो भी रिटेल गैस एजेंसी म गैस खतम होय के नौबत नइ आय हे। संग म मंत्रालय ह ये घलोक कहिस कि एलपीजी गैस सिलेंडर के जमाखोरी अउ कालाबाजारी ला रोके बर देस भर म लगातार कारवाही चल्त हे।

कच्चा तेल के पूरा भंडार हे

सरकार ह कहिस कि होर्मुज संकट के बाद घलोक देस भर म पेट्रोलियम उत्पाद अउ एलपीजी के बिना कोनो रुकावट के सप्लाई बर जरूरी कदम उठाय जात हे। संग म सबो रिफाइनरी मन पूरा ताकत ले काम करत हें अउ ओकर मन करा कच्चा तेल के पूरा भंडार हे। रिफाइनरी मन म स्थानीय स्तर म घलोक एलपीजी के उत्पादन ला बढ़ा दे गे हे।