Sakti : छत्तीसगढ़ पुलिस के बुता-बनी ला देखो। एक झिन महिला शिकायत लेकर पुलिस के पास पहुंचिस। थाना म टीआई घलो बइठे रहिस। महिला ला रातभर थाना म बइठार के रखे गिस अउ ओकर रपट घलो नई लिखिस। पुलिस बर ये हा आम बात होही, पर ये मामला ह सीएम करा पहुंच गे। का ए पूरा मामला, आओ तुमन ला बताथन।

सुशासन तिहार के तहत लगे जन चौपाल म ओ समे माहौल ह गंभीर होगे, जब एक झिन महिला ह मुख्यमंत्री के सोझा म ही पुलिस के काम-काज ऊपर सवाल उठा दिस। सिरली गांव के रहइया ए महिला ह सक्ती थाना प्रभारी (TI) ऊपर ओकर सिकायत ला अनसुना करे अउ कतको घंटा तक थाना म बइठार के रखे के अरोप लगाईस। महिला ह कहिस कि ओहा छेड़खानी अउ मार-पीट के सिकायत दर्ज कराए बर थाना पहुंचे रहिस, पर रातभर नियाव बर गोहराए के बाद घलो ओकर बात ला नई सुनिस। महिला के सिकायत ला सुन के मुख्यमंत्री ह मामला के जांच करे के सुना दितिन।

ठठारी गांव म लगे जन चौपाल म बड़ संख्या म गामी लोगन मन अपन-अपन दुख-पीडा लेके पहुंचे रहिन। ओती सिरली गांव के एक महिला ह मंच के सोझा आके अपन पीरा सुनाईस। महिला ह बताईस कि ओकर संग छेड़खानी अउ मार-पीट के घटना होय रहिस, जेकर बाद ओहा नियाव के आस लेके सक्ती थाना पहुंचिस। पर ओला ओहां सुथघर के जगा निराशा मिलिस।

महिला के मुताबिक, ओहा 5 जून के रात अपन सिकायत लिखे बर थाना गय रहिस। ओकर कहना रहिस कि थाना प्रभारी अउ पुलिस वाले मन ओकर सिकायत ला संसो म नई लिन। ओला कतको घंटा थाना म बइठार के रखिन अउ रपट दर्ज नई करिन। महिला ह कहिस कि ओहा रात के करीब 3 बजे तक थाना म बइठे रहिस, पर ओकर सिकायत ऊपर कोनो कारवाही नई होईस।

जन चौपाल म महिला ह मुख्यमंत्री ला बताईस कि ओहा पाछू 15 दिन ले लगातार थाना के चक्कर काटत हे। कतको बार बड़ अधिकारी मन करा गोहराय के बाद घलो ओकर सिकायत दर्ज नई करे गिस अउ न ही मामला म कोनो कड़ा कदम उठाए गिस। महिला ह कहिस कि नियाव पाय बर ओला बार-बार पुलिस थाना के चक्कर काटे बर परत हे, पर ओकर सुनइया कोनो नई हे।

मुख्यमंत्री के सोझा सिकायत राखत महिला ह साफ जांच अउ दोसी अधिकारी मन ऊपर कारवाही के मांग करिस। महिला के बात सुन के ओहां बइठे लोगन मन के बीच घलो गोठ-बात सुरु होगे। गामी मन घलो पुलिस के अइसन बुता ऊपर गस्सा देखाइन अउ महिला ला नियाव दियाय के मांग करिन।

मुख्यमंत्री ह महिला के सिकायत ला संसो म लेत तुरंते संज्ञान लिन। ओमन मंच ले ही अधिकारी मन ला मामला के जांच करे के आदेस दे दिन। महिला के जम्मो बात ला सुने के बाद मुख्यमंत्री ह कहिन, “ठीक हे, दिखवावबो।” एकर संग ही ओमन जुड़ाय अधिकारी मन ले मामला के असलियत के जानकारी लेके जरूरी कारवाही करे बर कहिन।

मुख्यमंत्री के आदेस के बाद प्रशासनिक अउ पुलिस महकमा म हड़कंप मच गे हे। अब ये देखना बड़ बात होही कि जांच म का बात सोझा आथे अउ थाना प्रभारी के खिलाफ कोनो कारवाही होते कि नई। ए घटना ह एक बार फिर पुलिस बेवस्था अउ सिकायत मन के निपटाए के तरीका ऊपर सवाल खड़ा कर दे हे। सुशासन तिहार के बुता ही ए हे कि आम लोगन के दुख-तकलीफ ला सोझा सुन के ओकर समाधान करे जाय। सक्ती म सोझा आय ये मामला घलो एही कड़ी के हिस्सा हे, जहां एक महिला ह जम्मो जन के सोझा अपन पीरा ला रोइस अउ नियाव मांगिस।