मिवान स्टील प्लांट के मजदूर मन ह करिन काम बंद, मांग पूरा नई होए म अनिश्चितकालीन आंदोलन के दीस चेतावनी
Mivan Steel Plant : रायपुर। रायपुर के मंदिर हसौद म बने मिवान स्टील प्लांट के सैकड़ों मजदूर मन अपन जुन्ना मांग मन ला लेके हड़ताल म बइठ गे हें। बार-बार आवेदन दे के बाद घलो जब प्रबंधन कोनो सुध नई लीस, त मजदूर मन गुस्सा म आके काम-बुता बंद कर दीन अउ प्लांट के बाहर खड़े होके जोरदार प्रदर्शन करिन।
कर्मचारी संघ के अध्यक्ष बंटी मिश्रा अउ दूसर मजदूर मन ह आरोप लगाईन कि ए कंपनी म कोनो नियम-कानून नई चलत हे। उमन किहिन कि हमन ले बंधुआ मजदूर मन सही काम कराये जाथे अउ हमर सोसन होवत हे। मजदूर मन के कहना हे कि जब तक उंकर मांग पूरा नई होही, उमन पीछे नई हटंय।
मजदूर मन के प्रमुख मांग: मजदूर मन ह अपन हक बर लंबा-चौड़ा मांग रखे हें। उंकर कहना हे कि हर साल तनख्वाह बढ़ाये जाय, ओवरटाइम के डबल पइसा मिले अउ तिहार-दउंर म काम करे म दोगुना पइसा दिये जाय। ओ मन ह हर महीना 4 दिन के सवेतन छुट्टी (अइसन छुट्टी जेकर पइसा झन कटे) के मांग घलो करे हें। मजदूर मन के ये घलो कहना हे कि सबो ला नियुक्ति पत्र अउ वेतन पर्ची मिलना चाहिये, अउ बिना कोनो ठोस कारन के ककरो नौकरी झन छिन जाय।
एकर संगै-संग, 5 साल ले ज्यादा काम करेइया मन ला ‘स्किल्ड’ अउ 10 साल ले ऊपर वाले मन ला पक्का (स्थायी) करे के मांग रखे गे हे। मजदूर मन ह ESI, PF, बोनस, अउ सुरक्षा के सामान देय के घलो बात किहिन हे। उमन साफ चेतावनी दीस हे कि यदि प्रबंधन ह उंकर बात नई मानिस, त ये हड़ताल ह अनिश्चितकालीन आंदोलन म बदल जाही, जेकर पूरा जिम्मेदारी कंपनी के होही।
