PNG गैस कनेक्शन कइसे लेव? जानव पाइपलाइन के गैस सिलेंडर ले सस्ता परही या महंगा

LPG vs PNG Price : नई दिल्ली। दुनिया भर म चलत तनाव के असर अब हमर देश म घलो तेल अउ गैस के सप्लाई म दिखे बर धर ले हे। कतको जगह म मनखे मन ला LPG सिलेंडर बुक करे म दिक्कत आवत हे, त कहुं डिलीवरी म देरी होत हे। अइसन म जेकर मन के शहर म गैस पाइपलाइन के सुविधा हे, ओमन अब PNG कनेक्शन ले के सोचत हें।

अगर आप मन घलो दुविधा म हो कि पाइपलाइन वाला गैस (PNG) बढ़िया हे या सिलेंडर वाला (LPG), त आउ एला विस्तार ले समझथन:

LPG अउ PNG म कोन हा जादा सुविधाजनक हे?

सुविधा के बात करबो त PNG कनेक्शन ह जादा आरामदेह माने जाथे। एमां गैस सोझे पाइपलाइन ले आप मन के किचन तक पहुंचथे। एखर मतलब ये हे कि आप ला सिलेंडर खतम होय के चिंता नई राहय अउ न ही बार-बार रिफिल बुक करे बर परय। LPG म कई बार बुकिंग के बाद घलो सिलेंडर आए म देरी हो जाथे, पर PNG म गैस के सप्लाई 24 घंटा चालू रहिथे।

खर्चा म कतका अंतर हे?

खर्चा के मामला म घलो दूनों म अंतर हे। हमर देश म घरेलू LPG सिलेंडर (14.2 किलो) के कीमत लगभग 800 ले 1100 रूपया तक होथे। उहें PNG म बिजली बिल सही मीटर लगे रहिथे। आप मन जतका गैस खरच करहू, ओतके के बिल पटाए बर पड़ही। जादातर शहर म PNG के रेट 40 ले 60 रूपया प्रति यूनिट के आसपास हे। अगर घर म गैस के जादा उपयोग हे, त PNG ह आप मन ला सस्ता परही।

का PNG जादा सुरक्षित हे?

सुरक्षा के नजर ले घलो PNG ला बेहतर माने जाथे। गैस कंपनी मन पाइपलाइन म सुरक्षा के कड़ा नियम के पालन करथें अउ समय-समय म एखर जांच घलो करथें। बस ये ध्यान रखे बर पड़थे कि पाइपलाइन के फिटिंग सही ढंग ले होय राहय।

कइसे मिलही PNG कनेक्शन?

अगर आप मन PNG कनेक्शन लेना चाहत हो, त सबले पहिली ये पता करव कि आप मन के इलाका म पाइपलाइन बिछे हे कि नई। अगर सुविधा हे, त ए तरीका अपनाव:

• गैस वितरण कंपनी के वेबसाइट म जाके ऑनलाइन आवेदन कर सकत हो।

• एखर बर आधार कार्ड, पहचान पत्र अउ पता के ठिकाना (Address Proof) जैसे दस्तावेज जरूरी हे।

• फार्म भरे के बाद कंपनी के टेक्नीशियन आप मन के घर आही अउ पाइपलाइन के संग मीटर फिट कर देही।

• कुछ दिन के भीतर आप मन के PNG कनेक्शन चालू हो जाही।