PM मोदी ह रचिन इतिहास, Instagram मा 100 मिलियन फॉलोअर्स पार करेइया दुनिया के पहिली लीडर बनिन
PM Narendra Modi Instagram Records : नई दिल्ली : देश होवय चाहे दुनिया, प्रधानमंत्री नरेंद्र मोदी के डंका सबो जगा बाजत हे। उनखर लोकप्रियता ल अब पूरा दुनिया जान गे हे और अब ए बात के पुस्ती इंस्टाग्राम के डेटा ह घलो कर दे हे। पीएम मोदी इंस्टाग्राम मा 100 मिलियन (10 करोड़) फॉलोअर्स के आंकड़ा पार करेइया दुनिया के पहिली ग्लोबल लीडर बन गे हें। ए ऐतिहासिक उपलब्धि के साथ ओमन अमेरिकी राष्ट्रपति डोनाल्ड ट्रंप समेत दुनिया के जम्मो बड़े दिग्गज मन ल पाछू छोड़ दीन हें।
इंस्टाग्राम के नवा आंकड़ा के मुताबिक, पीएम मोदी के फॉलोअर्स के संख्या अमेरिकी राष्ट्रपति डोनाल्ड ट्रंप (43.2 मिलियन) ले दुगुना ले घलो जादा हे। दुनिया के दूसर प्रमुख नेता मन के बात करबो त इंडोनेशिया के राष्ट्रपति प्रबोवो सुबियांटो (15 मिलियन), ब्राजील के राष्ट्रपति लूला (14.4 मिलियन) और तुर्की के राष्ट्रपति एर्दोगन (11.6 मिलियन) के साथ तीसर, चउथा और पांचवा नंबर मा हें। गजब बात तो ए हे कि दुनिया के पांच बड़े ग्लोबल लीडर्स के कुल फॉलोअर्स ल मिला देबो, तभो ओमन अकेले पीएम मोदी के बराबरी नई कर पाइन।
भारत के भीतर घलो पीएम मोदी के डिजिटल पहुंच बहुत जादा हे। उनखर बाद उत्तर प्रदेश के मुख्यमंत्री योगी आदित्यनाथ (16.1 मिलियन) और राहुल गांधी (12.6 मिलियन) के नंबर आथे, जो पीएम मोदी के मुकाबला मा बहुत पाछू हें। ए रिकॉर्ड अइसन समय मा बने हे जब पीएम मोदी अपन दो दिन के इजरायल दौरा मा हें, जिहां ओमन ल इजरायली संसद के सबले बड़े सम्मान ‘स्पीकर ऑफ द नेसेट मेडल’ ले नवाजे गे हे। साल 2014 मा इंस्टाग्राम ले जुड़े के बाद पिछले दस साल मा पीएम मोदी के अकाउंट दुनिया के सबले जादा देखे जावेइया डिजिटल प्लेटफॉर्म बन के उभरे हे।
