स्मार्ट होही सरकारी स्कूल के पढ़ाई, अक्टूबर ले शुरू होही लाइव क्लास
छत्तीसगढ़ के सरकारी स्कूल मन म बदलि पढ़ाये के तरीका, अक्टूबर ले साइंस अउ गणित के लाइव क्लास विषय विशेषज्ञ मन ले पढ़ही लइका, कमजोर विषय मन ऊपर रहिही विभाग के खास ध्यान
रायपुर। छत्तीसगढ़ के सरकारी स्कूल मन म पढ़ाई के तरीका अब बदले बर जावत हे। स्कूल शिक्षा विभाग ह लइका मन ला बढ़िया शिक्षा दे बर नवा व्यवस्था तैयार करे हे। अक्टूबर महिना ले प्रदेश के स्कूल मन म विज्ञान अउ गणित जइसन कठिन विषय मन के संभाग स्तर म लाइव ऑनलाइन क्लास शुरू करे जाही। ए क्लास मन के जरिए उहू लइका मन ला विषय विशेषज्ञ मन ले पढ़े के मौका मिलही, जिहाँ स्कूल मन म वो विषय के शिक्षक नइये।
नवा व्यवस्था म डिजिटल माध्यम मन के इस्तेमाल बढ़ाए जाही। स्मार्ट बोर्ड, दीक्षा पोर्टल अउ ऑनलाइन क्लास के मदद ले लइका मन ला पढ़ाए जाही। विभाग के उद्देश्य हे कि हर स्कूल के लइका मन ला गुणवत्तातक शिक्षा मिल सकै अउ कतको लइका के पढ़ाई शिक्षक के कमी के सेती प्रभावित न होवय।
संभाग स्तर ले चलही ऑनलाइन क्लास स्कूल शिक्षा विभाग ह तय करे हे कि भौतिक विज्ञान, रसायन विज्ञान, जीव विज्ञान अउ गणित जइसन विषय मन के लाइव क्लास संभाग स्तर ले आयोजित करे जाही। ए क्लास मन म अनुभवी शिक्षक अउ विषय विशेषज्ञ मन लइका मन ला पढ़ही। संग म लइका मन ला पढ़ाई ले जुड़े समस्या मन ला पूछे अउ समझे के मौका घलो मिलही।
खासकर देहात क्षेत्र मन अउ अइसन स्कूल मन ऊपर ध्यान दे जाही, जिहाँ विषय विशेषज्ञ शिक्षक मन के कमी हे। विभाग के मानना हे कि ऑनलाइन पढ़ाई ले ए स्कूल मन के लइका मन ला घलो बढ़िया शैक्षणिक अवसर मिल सकही।
दिसंबर तक पूरा करे बर पड़ही सिलेबस शिक्षा विभाग ह स्कूल मन ला दिसंबर तक पूरा सिलेबस खतम करे के लछन दे हे। विभाग के अनुसार अभी के सत्र म अब सीमित दिन बचे हे। अइसन म स्कूल मन ला नियमित क्लास लगाए अउ समय म पाठ्यक्रम पूरा करे के निर्देश दे गे हे।
स्कूल मन के पढ़ाई के लगातार समीक्षा घलो करे जाही। लइका मन के प्रगति ऊपर नजर रखे बर स्कूल स्तर म रिकॉर्ड तैयार करे जाही। विभाग ह ए घलो साफ करे हे कि लइका मन ला केवल बाजार म मिले वाले गाइड ले पढ़ाये के बजाय तय पाठ्यपुस्तक मन के आधार म पढ़ाई कराए जाय।
अगर कोई शिक्षक केवल गाइड के भरोसे पढ़ाही त ओकर खिलाफ कारवाही करे जा सकत हे। विभाग के कहना हे कि लइका मन ला विषय के सही समझ दे बर मूल पाठ्यपुस्तक मन ऊपर ध्यान देना जरूरी हे।
5वीं ले 8वीं तक मजबूत होही बुनियादी पढ़ाई नवा योजना म छोटे लइका मन के बुनियादी शिक्षा ला घलो प्राथमिकता दे गे हे। कक्षा 5वीं ले 8वीं तक के लइका मन के पढ़े अउ समझे के क्षमता ला बढ़ाए ऊपर जोर दे जाही।
विभाग ह लछन रखे हे कि सबो लइका मन हिंदी अउ अंग्रेजी ला बढ़िया ले पढ़ अउ समझ सकयं। एखर संग म लइका मन ला 20 ले 25 तक के पहाड़ा याद कराए के अभियान घलो चलाए जाही।
जेन स्कूल अउ शिक्षक ए लछन मन ला बढ़िया तरीका ले पूरा करही, ओमन ला सम्मानित करे के योजना घलो बनाए गे हे। एखर ले स्कूल मन के बीच बढ़िया काम करे के प्रतिस्पर्धा बढ़ही।
शनिवार के बैगलेस डे म होही प्रतियोगी परीक्षा के तैयारी स्कूल मन म हर शनिवार के होए वाले बैगलेस डे के उपयोग अब नवा तरीका ले करे जाही। ए दिन लइका मन ला प्रतियोगी परीक्षा मन के तैयारी घलो कराए जाही।
कक्षा 5वीं अउ 8वीं के लइका मन ला साइंस ओलंपियाड, एनएमएमएसई, श्रेष्ठ, नवोदय अउ प्रयास जइसन परीक्षा मन बर तैयार करे जाही। विभाग के उद्देश्य हे कि सरकारी स्कूल के लइका मन घलो शुरुआती स्तर ले प्रतियोगी परीक्षा मन बर तैयार हो सकें।
एमडीएम व्यवस्था ला लेके घलो नवा निर्देश स्कूल मन म मिले वाले मध्याह्न भोजन ला लेके घलो शिक्षा विभाग ह दिशा-निर्देश जारी करे हे। जिन स्कूल मन म सेंट्रल किचन के सुविधा नइये, वहाँ भोजन स्कूल परिसर म ही तैयार करे जाही।
विभाग ह रसोईघर के साफ-सफाई ऊपर विशेष ध्यान दे बर कहे हे। रसोई के नियमित सफाई अउ पोताई कराए बर पड़ही। एखर अलावा एक्सपायरी डेट वाले मसाला अउ खराब सामान के इस्तेमाल ऊपर पूरा रोक रहिही।
लइका मन ला भोजन परोसे ले पहिले रसोइया अउ शिक्षक ला भोजन चाखना जरूरी होही। एखर ले भोजन के गुणवत्ता अउ सुरक्षा पक्का करे जा सकही।
स्वामी आत्मानंद स्कूल मन म घलो लइका मन ला स्कूल म तैयार भोजन ले बर प्रेरित करे जाही। विभाग के कहना हे कि लइका मन ला संतुलित अउ सुरक्षित भोजन देना घलो शिक्षा व्यवस्था के अहम हिस्सा हे।
शिक्षा व्यवस्था म डिजिटल बदलाव के तैयारी छत्तीसगढ़ सरकार अउ स्कूल शिक्षा विभाग के ध्यान अब पढ़ाई म तकनीक के जादा इस्तेमाल ऊपर हे। लाइव क्लास, डिजिटल प्लेटफॉर्म अउ विशेषज्ञ शिक्षक मन के मदद ले सरकारी स्कूल मन म शिक्षा के गुणवत्ता सुधारे के कोसिस करे जावत हे।
