नक्सल मोर्चा में तेलंगाना ले बड़का खबर, बस्तर कैडर के 47 माओवादी आज करहीं सरेंडर
Chhattisgarh News : जगदलपुर। नक्सल मोर्चा ले तेलंगाना ले एक ठन बड़ खबर निकल के आति हे। 18 बछर के महिला माओवादी मुडियम रामे उर्फ राजिता के आत्मसमर्पण के बाद अब छत्तीसगढ़ कैडर के 47 अउ नक्सली मन सरेंडर करे के तइयारी में हें। ये हलचल भले तेलंगाना में होवत हे, फेर एकर सीधा असर हमर बस्तर में घलो दिखही, काबर कि सरेंडर करेइया जम्मो नक्सली बस्तर इलाका में सक्रिय रहिन।
तेलंगाना के मुलुगु जिला ले मिले जानकारी के मुताबिक, 18 बछर के मुडियम रामे उर्फ राजिता ह मुलुगु पुलिस के आगू आत्मसमर्पण करके हिंसा के रस्ता छोड़ देहे के फैसला लिस। मुलुगु एसपी सुधीर रामनाथ केकान ह ओला 25 हजार रूपया के मदद घलो दिस। मुडियम रामे ह बीजापुर जिला के बसागुड़ा क्षेत्र के रहइया आय अउ साउथ बस्तर डिवीजनल कमेटी में पार्टी सदस्य के रूप में काम करत रहीस।
खबर ये घलो आवत हे कि राजिता के बाद आज हैदराबाद में बड़ संख्या में माओवादी मन सरेंडर करहीं। एमा बटालियन नंबर-1 के कमांडर हेमला वेज्जा के संग छत्तीसगढ़ कैडर के 47 माओवादी 34 हथियार मन के साथ आत्मसमर्पण करे बर जावत हें। ये जम्मो नक्सली तेलंगाना डीजीपी शिवधर रेड्डी के आगू सरेंडर करहीं। सुरक्षा एजेंसी मन बर येला एक बड़ कामयाबी माने जावत हे।
