अब 16 जून के बजाय 1 अप्रैल ले शुरू होही नवा स्कूल सत्र, शिक्षा मंत्री गजेंद्र यादव के बड़ फैसला
Chhattisgarh School Reopening Date : रायपुर। छत्तीसगढ़ के सरकारी स्कूल मन मा पढ़ाई-लिखाई के ढर्रा ला सुधारे बर सरकार ह एक बड़ बदलाव करे हे। अब प्रदेश मा नवा शैक्षणिक सत्र ह 16 जून के बजाय 1 अप्रैल ले शुरू हो जाही। स्कूल शिक्षा मंत्री गजेंद्र यादव के अध्यक्षता मा होय राज्य स्तरीय समीक्षा बैठक मा ये अहम निरने लय गे हे। ये बैठक मा प्रदेश भर के जम्मो संभाग के संयुक्त संचालक अउ जिला शिक्षा अधिकारी (DEO) सामिल रीहिन।
नवा नियम लागू होय ले अब स्टेट बोर्ड के स्कूल मन के पैटर्न घलो पूरा तरीका ले सीबीएसई (CBSE) के तर्ज मा हो जाही। अप्रैल के पूरा महीना स्कूल खुली, जेमा लइका मन ला किताब अउ यूनिफॉर्म बांट दे जाही अउ पढ़ाई घलो शुरू हो जाही। एकर बाद 1 मई ले लइका मन ला गरमी के छुटी (Summer Vacation) दे जाही। गरमी के छुटी बर लइका मन ला होमवर्क घलो दिये जाही, ताकि नवा सिलेबस ह समे मा पूरा हो सके।
ऐप ले हाजिरी नई डारीस त कटही वेतन
बैठक मा मास्टर मन के लेटलतीफी अउ लापरवाही ऊपर कड़ा रुख अपनावत शिक्षा मंत्री ह साफ कहिन कि अब जम्मो मास्टर मन ला वीएसके (VSK) ऐप के माध्यम ले ही अपन हाजिरी डारे बर परही। अगर कोनो मास्टर ह ये ऐप ले हाजिरी नई डारीस, त ओला सीधे अनुपस्थित (Absent) मान ले जाही अउ ओ दिन के तनख्वाह ला काट दे जाही। एकर अलावा, छुटी बर अरजी घलो इही ऐप के माध्यम ले ही दे बर परही।
डेटा अपडेट करे बर जून के आखिरी तक के मियाद
शिक्षा मंत्री ह सरकारी स्कूल अउ जिला शिक्षा कार्यालय मन कोति ले समे मा डेटा पोर्टल मा अपलोड नई करे बर कड़ा नाराजगी जताइन। अधिकारी मन ला कड़क हिदायत दे गे हे कि जून के आखिरी तक हर हाल मा स्कूल मन के पूरा डेटा ऑनलाइन अपडेट हो जाना चइही। यदि तय समे मा काम पूरा नई होईस, त संबंधित स्कूल के प्रिंसिपल (Principal) अउ जिम्मेदार अधिकारी मन के वेतन ला रोक दे जाही।
पढ़ाई के नवा पैमाना तय: शिक्षा मंत्री ह बैठक मा निरदेस दिन कि प्राथमिक स्तर (Primary school) के लइका मन ला हर हाल मा बारहखड़ी, हिंदी-अंग्रेजी के फर्राटेदार रीडिंग अउ 20 तक के पहाड़ा याद होना चइही। उहें माध्यमिक स्तर (Middle school) के छात्र मन ला 25 तक के पहाड़ा अउ भाषा के नीक समझ होना जरूरी हे। एकर बर स्कूल मन मा बिसेस अभियान चलाए जाही।
