जनगणना 2026-27: 16 ले शुरू होही मकान मन के गिनती, मुखिया अउ सामान के घलो होही पूछताछ
Chhattisgarh Census 2026-27 : छत्तीसगढ़ म जनगणना-2027 के पहिली चरन 16 अप्रैल ले शुरू होवत हे। ए बखत मकान मन के गिनती करे जाही। घर म कतका मनखे हें, मुखिया के नाम का हे, मकान कच्चा हे या पक्का अउ घर म का-का बड़े सामान हे, ए सबो के जानकारी दर्ज करे जाही।
ए बार जनगणना म मनखे मन बर ऑनलाइन सुविधा घलो दे जावत हे। 16 ले 30 अप्रैल के बीच मनखे मन खुद ऑनलाइन फॉर्म (स्व-गणना) भर सकथें। एखर से ओ परिवार मन ला राहत मिलही जे मन नौकरी या कोनो दूसर काम ले दिन भर घर के बाहिर रहिथें।
अक्सर देखाय हे कि जब सर्वे करे बर टीम घर पहुंचथे त ताला लगे रहिथे। अइसन म मकान ला “डोर लॉक” मान के एंट्री कर दे जाथे, जेखर से सही जानकारी नई मिल पाय। ए समस्या ले बचे बर अधिकारी मन ऑनलाइन फॉर्म भरे के सलाह देवत हें। एखर बर सिरिफ 15 दिन के टेम मिलही। फॉर्म भरे म 15-20 मिनट लगही अउ भरे के बाद 11 अंक के एक ठन आईडी (ID) मिलही। जब प्रगणक घर आही, त ओला सिरिफ वो आईडी ला बताना होही।
जेन जिहां रहिथे, उहें के देना होही जानकारी
जनगणना के पहिली चरन म मनखे मन जिहां रहत हें, उहें के जानकारी देना होही। अगर कोनो के एक ले जादा मकान हे, त ओ मन जिहां रहिथें उहें के जानकारी देहीं। किराया म रहे वाला मनखे उही घर के जानकारी देहीं जिहां वो रहत हें। हॉस्टल म रहे वाला लइका मन घलो अपन हॉस्टल के ही जानकारी देहीं।
ऑनलाइन फॉर्म भरे के 5 आसान तरीका:
पोर्टल म लॉगिन: वेबसाइट https://se.census.gov.in म जाव, अपन राज्य चुनव अउ कैप्चा भरव।
पंजीकरण: मुखिया के नाम अउ मोबाइल नंबर डाल के ओटीपी ले वेरीफाई करव।
लोकेशन: जिला, गांव/शहर, पिनकोड भरव अउ मैप म घर ला मार्क करव।
फॉर्म भरव: मकान कच्चा-पक्का, पानी, बिजली, शौचालय अउ मोबाइल-इंटरनेट के जानकारी भरव।
सबमिट: फॉर्म चेक करके सबमिट करव अउ 11 अंक के एसई आईडी (SE ID) ला सम्हाल के राखव।
1 मई ले घर-घर आही प्रगणक
30 अप्रैल तक ऑनलाइन फॉर्म भरे के बाद, 1 मई ले पूरे छत्तीसगढ़ म 53 हजार प्रगणक मन घर-घर जाहीं। जे मन ऑनलाइन फॉर्म भर डरे हें, ओ मन ला सिरिफ अपन आईडी दिखाना होही। अउ जे मन नई भरे हें, ओ मन के जानकारी प्रगणक मन खुद भरहीं। ए प्रक्रिया ह महीना भर चलही।
