मरीन ड्राइव म हंगामा : जय जवान पेट्रोल पंप म पानी वाला पेट्रोल बेचे के आरोप, गाहक मन मांगिन हर्जाना
जय जवान पेट्रोल पंप मरिहन ड्राइव (रायपुर) म मिलावटी पेट्रोल बेचे के बड़का मामला आगू आइस हे। आरोप हे कि पेट्रोल पंप के नोजल ले पानी मिलाय पेट्रोल निकलत रीहिस, जेकर से कतकोन गाड़ियां मन के इंजन खराब हो गे। कतकोन गाड़ीवाला मन के कहना हे कि पेट्रोल डलवाय के कुछू बेर बादे ओमन के गाड़ी बंद हो गे अउ कतकोन गाड़ी मन के इंजन सीज होय के नौबत आ गे।
लोगन मन करिन हंगामा
घटना के पता चलीस त बड़ संख्या म गाड़ी मालिक अउ ग्राहक मन पेट्रोल पंप पहुंच गेन। रिसियाय लोगन मन पेट्रोल पंप म जम्मों हंगामा करिन अउ दोषी मन के खिलाफ कड़ा कारवाही के मांग करिन। देखते-देखत उहां पूरा अफरा-तफरी मच गे।
आर्थिक नुकसान: गाहक मन के आरोप हे कि पेट्रोल म पानी के मिलावट के सेती ओमन ला भारी खरचा उठाना पड़त हे।
हर्जाना के मांग: कतकोन लोगन मन अपन गाड़ी के मरम्मत (रिपेयरिंग) के खरचा पेट्रोल पंप संचालक ले देवाए के मांग करे हें।
अधिकारी पहुंचिन, जांच सुरू
खबर मिलत ही संबंधित विभाग अउ प्रशासन के अधिकारी मन अउ पुलिस मउका म पहुंचिन। पेट्रोल के सैंपल लेके जांच के तैयारी करे जात हे। जांच के रिपोर्ट आए के बादे साफ हो पाही कि ईंधान म सचमुच मिलावट होय रीहिस या फेर कतहुं अउ गड़बड़ी रीहिस। फिलहाल, पेट्रोल पंप म गाहक मन के गुस्सा अभी घलो बने हुए हे अउ जांच के मांग तेज हो गे हे।
