1 मार्च ले बिना चालू सिम के नइ चलय वॉट्सऐप अउ टेलीग्राम, जानव का ए ‘सिम बाइंडिंग’ नियम

Sim Binding Rule : नई दिल्ली। अगर आप मन घलो वॉट्सऐप, टेलीग्राम या सिग्नल जैसे मैसेजिंग ऐप के उपयोग करथौ, त ये खबर आप मन बर बड़े काम के हे। 1 मार्च ले सरकार ‘सिम बाइंडिंग’ के नवा नियम लागू करे बर जावत हे। ए नियम के आए के बाद अब आप मन बिना एक्टिव सिम कार्ड के अपन मोबाइल में मैसेजिंग ऐप नइ चला सकव।

का ए सिम बाइंडिंग नियम?

नवा नियम के मुताबिक, अब वॉट्सऐप अउ टेलीग्राम जैसे ऐप मन ल ये पक्का करे बर पड़ही कि जेकर अकाउंट हे, ओकर सिम कार्ड मोबाइल में लगे राहय अउ चालू राहय। अभी का होथे कि एक बार ओटीपी (OTP) आए के बाद अगर आप सिम ल निकाल घलो देथौ, त वॉट्सऐप चलत रहिथे। फेर 1 मार्च ले अइसन नइ होही। अगर आप मन के सिम बंद होगे या मोबाइल ले निकल गे, त मैसेजिंग ऐप घलो काम करना बंद कर दहि।

साइबर ठगी ल रोके बर सरकार सख्त

टेलीकॉम मंत्री ज्योतिरादित्य सिंधिया ह साफ कहि दे हें कि ए नियम के तारीख ल आगे नइ बढ़ाए जाय। सरकार ह ए कदम बढ़त साइबर फ्रॉड अउ विदेश ले होवइया डिजिटल घोटाला मन ल रोके बर उठाए हे। नवंबर 2025 में दूरसंचार विभाग ह ए गाइडलाइन जारी करे रिहिस, जेकर 90 दिन के समय अब 28 फरवरी ल खत्म होवत हे।

वेब यूजर बर बदल जाही नियम

सिर्फ मोबाइलच नइ, जउन मन कंप्यूटर या लैपटॉप में वॉट्सऐप वेब के उपयोग करथें, ओ मन बर घलो नियम बदल जाही। अब वेब वर्जन हर 6 घंटा में अपने-आप लॉग-आउट हो जाही। यूजर मन ल फिर ले क्यूआर (QR) कोड स्कैन करके लॉग-इन करे बर पड़ही। सरकार के कहना हे कि ए नियम ले यूजर मन के डेटा अउ अकाउंट जादा सुरक्षित रहिही। हालांकि, जउन मन रोमिंग में हें, ओ मन ल घलो घबराए के जरूरत नइ हे, बस सिम कार्ड चालू रहना चाही।