सोना-चांदी म ‘महा-विस्फोट’: जुद्ध के आगी ले रॉकेट बनीस रेट, का 2 लाख पार करही सोना?
मुंबई/नई दिल्ली। दुनिया भर म मचे हाहाकार अउ खाड़ी देस (मिडिल ईस्ट) के बिगड़त हालत मन ह सोना-चांदी के भाव म आगी लगा दे हे। सोमवार के जइसे ही भारतीय वायदा बाजार (MCX) खुलीस, निवेशक मन के होस उड़ गे। अमेरिका अउ इजराइल डहार ले ईरान ऊपर करे गे बड़े हमला अउ उहां के बड़े नेता के मौत के खबर ले बाजार म हड़कंप मच गे हे। लोगन मन अपन पइसा ला सुरक्षित रखे बर अब अंधाधुंध सोना खरीदत हें, जेखर सेती एकरे मांग अउ रेट दूनों बाढ़ गे हे।
सोना ह बनीस रॉकेट, चांदी घलो मारीस लंबी छलांग
MCX म अप्रैल के सोना के भाव करीबन 5,811 रुपिया के भारी बढ़त के साथ 1,67,915 रुपिया (प्रति 10 ग्राम) पहुंच गे हे। ओहिचे, चांदी के गोठ करबो त मार्च वाले चांदी ह 9,492 रुपिया महँगा होके 2,84,490 रुपिया (प्रति किलो) के ऐतिहासिक स्तर म पहुंच गे हे। जानकार मन के कहना हे कि ये त अभी शुरुआत आय, काबर कि जब-जब दुनिया म जुद्ध के बादल मँडराथे, सोना-चांदी के भाव अगास छुवन लगथे।
का 2,00,000 के आंकड़ा पार करही सोना?
बाजार के पंडित मन के मानना हे कि अंतरराष्ट्रीय स्तर म जउन तनाव चलत हे, ओ ह अभी जल्दी सांत नई होवय। ‘जियोजित इन्वेस्टमेंट्स’ के कहना हे कि अगर जुद्ध अउ बढ़िस, त भारतीय बाजार म सोना के भाव 2,00,000 रुपिया के जादुई आंकड़ा ला घलो पार कर सकत हे। अंतरराष्ट्रीय बाजार म चांदी के भाव $100 प्रति औंस के पार जाय के पूरा संभावना हे।
निवेशक मन बर का हे सलाह?
बाजार के जानकार मनोज कुमार जैन ह बताय हें कि अभी मार्केट म भारी उतार-चढ़ाव हे। जउन मन पइसा लगावत हें, ओ मन ला ‘स्टॉप लॉस’ लगाके ही काम करना चाहिये।
सोना बर: 1,63,300 रुपिया के ऊपर खरीदी के सलाह हे, जेकर लक्ष्य 1,67,000 रुपिया तक हो सकत हे।
चांदी बर: 2,85,500 रुपिया के ऊपर खरीदी करे जा सकत हे, जेकर लक्ष्य 2,96,000 रुपिया देखे जावत हे।
कुल मिला के, जुद्ध के ये बखत म सोना अउ चांदी अब सिर्फ गहना नई, बल्कि मुसीबत के समय के सबसे बड़े सहारा बनके उभरे हें। साल 1973 के बाद ये पहली बार हे जब सोना म लगातार सात महीना ले अइसन तेजी देखे बर मिलत हे।
