MP News : इंदौर के बाद अब भोपाल के पानी में जहर: राजधानी के कई इलाका में मिले खतरनाक बैक्टीरिया, पिए के पहिली बरतव सावधानी
MP News : भोपाल: मध्यप्रदेश के आर्थिक राजधानी इंदौर अउ सबसे सफा शहर के नाव कमाय वाला शहर में अभी गंदा पानी के मामला शांत घलो नहीं होय हे, अउ रोज मउत के आंकड़ा बाढ़त जात हे। पूरा देस भर में ए मामला के सेती माहौल गरमाय होय हे, तभे अब राजधानी भोपाल ले घलो डरावनी अउ चिंताजनक खबर आगू आए हे। यहाँ घलो पानी में अइसन घातक तत्व मिले हे, जेखर से मनखे मन के जान ला खतरा हो सकत हे।
सैंपल टेस्टिंग में पानी होगे फेल
असल में, भोपाल के पानी के जब जांच (Test) करेगीस, त पानी में खतरनाक बैक्टीरिया के अंश मिले हे। नगर निगम ह सहर के कुल 250 इलाका मन में पानी के जांच करवाइस, जेमा ले खानूगांव, बाजपेयी नगर अउ आदमपुर खंती इलाका के पानी ह टेस्टिंग में फेल होगे हे। ए क्षेत्र मन के पानी में संक्रमण के पुष्टि होय हे, जेखर से कई किसम के बीमारी फैले के डर हे।
जल स्त्रोत मन ला कर दीस बंद
पानी में संक्रमण मिले के बाद प्रशासन ह हड़कंप में हे। नगर निगम ह तुंरत कार्रवाई करत हुए ओ सबो इलाका के पानी के स्त्रोत (Sources) मन ला बंद करवा दे हे, जहाँ ले संक्रमण मिले के बात आगू आए हे। अधिकारी मन ह मनखे मन के सेहत ला ध्यान में रखत हुए सलाह दे हे कि पानी ला हमेशा उबाल के ही पियव।
मानवाधिकार के हनन: साफ पानी हर मनखे के अधिकार
साफ अउ सुरक्षित पानी पाना हर नागरिक के मौलिक अधिकार आय। इंदौर अउ भोपाल ले आवत ए खबर मन ह सीधे तौर ले मानवाधिकार के उल्लंघन आय। ‘जीवन के अधिकार’ के तहत जनता ला शुद्ध पेयजल मुहैया कराना सरकार अउ प्रशासन के पहिली जिम्मेदारी हे। पानी में घातक बैक्टीरिया मिलना आम जनता के जान संग खिलवाड़ आय। एखर बर जिम्मेदार अधिकारी मन ऊपर कड़ी कार्रवाई होना चाहिये अउ युद्धस्तर में सुधारात्मक कदम उठाना चाहिये ताकि अउ कोनो मासूम के जान झन जाय।
