2000 करोड़ के मिड-डे मील घोटाला, करोड़ों डकार गे अफसर मन
Rajasthan : जयपुर: कोरोना काल के ओ बखत जब पूरा देस महामारी ले लड़त रहीस अउ लइका मन के स्कूल बंद रहीस, तब राजस्थान में एक अइसन घिनौना घोटाला होय हे जेकर ले मानवता घलो सरमसार होगे हे। राज्य सरकार के ‘मिड-डे मील योजना’ के तहत लइका मन ला मिले वाला सूखा राशन में करीब ₹2000 करोड़ के महाघोटाला के खुलासा होय हे।
कागजी खेल अउ संगठित लूट नियम के मुताबिक, लॉकडाउन में स्कूल के लइका मन ला घर-घर जाके राशन के पैकेट बांटना रहीस। पर असलियत में, कागज में तो राशन बंट गे, पर लइका मन के थारी ह खाली रहि गे। भ्रष्टाचार निरोधक ब्यूरो (ACB) के जांच में ये डरावनी बात आगू आए हे कि विभाग के बड़े अधिकारी अउ रसूखदार फर्म मन मिल के योजना के नियम मन ला अपन हिसाब ले बदल डारिन।
कइसे डकार गे अफसर मन करोड़ों रुपिया? घोटाला करे के तरीका बहुते सातिर रहीस। टेंडर निकाले के बखत जानबूझ के सही अउ योग्य फर्म मन ला बाहर कर दे गिस, ताकि अपन चहेती कंपनी मन ला फायदा पहुँचाए जा सके। ए चहेती फर्म मन ह आगू काम ला अवैध रूप ले दूसर संस्था मन ला सउंप दंय (सबलेट), जेखर से फर्जी सप्लायर अउ ट्रांसपोर्टर मन के एक बड़े नेटवर्क खड़ा होगे। कतको घांव तो अइसन होइस कि न माल खरीदाइस अउ न लइका मन तक पहुँचे, बस फर्जी बिल लगा के सरकारी खजाना ले करोड़ों के भुगतान निकाल ले गिस।
ACB के रडार में भ्रष्टाचारी अफसर अब ये बड़े मिड-डे मील घोटाला के फाइल खुलते ही सरकारी दफ्तर मन में हड़कंप मच गे हे। ACB के एंट्री ले मची खलबली के बीच जांच टीम अब पइसा के लेनदेन अउ फर्जी दस्तावेज मन के बारीकी ले जांच करत हे। ये सीधा-सीधा ओ मासूम लइका मन के अधिकार के हनन आय जेखर हक ला अफसर मन मिल के मार डारिन। ब्यूरो के अधिकारी मन के कहना हे कि सबूत जुटाए जात हे अउ जल्दी ही ओ सबो चेहरा मन बेनकाब होही जे मन ए ₹2000 करोड़ के लूट के मास्टरमाइंड आय।
