छत्तीसगढ़ पुलिस में बड़े पैमाना म फेरबदल, 150 ले ज्यादा एएसपी अउ डीएसपी मन के होइस तबादला
रायपुर। छत्तीसगढ़ सरकार ह एक बेर फेर बड़े पैमाना म पुलिस अफसर मन के तबादला आदेश जारी करे हे। गृह विभाग कोति ले एएसपी, डीएसपी अउ निरीक्षक मन समेत 150 ले ज्यादा अधिकारी मन के ट्रांसफर लिस्ट जारी करे गे हे। रायपुर कमिश्नरेट अउ रायपुर ग्रामीण पुलिस समेत राज्य के कई जिला मन म तैनात एएसपी अउ डीएसपी मन के जगह बदले गे हे।
कई जिला मन के अतिरिक्त पुलिस अधीक्षक बदले
तबादला सूची म 56 एएसपी स्तर के अउ 92 डीएसपी स्तर के अफसर मन के नाम शामिल हे। ए सूची म रायपुर, दुर्ग, बीजापुर, दंतेवाड़ा, बलौदाबाजार, गरियाबंद अउ कोण्डागांव समेत कई जिला मन म तैनात अतिरिक्त पुलिस अधीक्षक मन के ट्रांसफर करे गे हे। जारी आदेश के मुताबिक सबो अधिकारी मन ल प्रशासनिक आधार म तुरंत नवा जगह म पदस्थापना दे गे हे।
ओपी शर्मा ल मिलीस मुख्यमंत्री सुरक्षा के जिम्मेदारी
आदेश के अनुसार राजेंद्र प्रसाद भैया ल पुलिस अधीक्षक (पीटीएस मैनपाट) बनाए गे हे। ओपी शर्मा ल मुख्यमंत्री सुरक्षा म पुलिस अधीक्षक के बड़ जिम्मेदारी सौंपे गे हे। उहें नीरज चंद्राकर ल प्रथम वाहिनी (छत्तीसगढ़ सशस्त्र बल, भिलाई-दुर्ग) के सेनानी बनाए गे हे। एखर अलावा गायत्री सिंह ल पुलिस मुख्यालय म सहायक पुलिस महानिरीक्षक (एनएचआरसी) के पद म पदस्थ करे गे हे।
