Chhattisgarh Electricity : रायपुर। छत्तीसगढ़ के बिजली उपभोक्ता मन बर एक ठन बहुत बड़का राहत के खबर आए हे। अब अगर आप मन के बिजली बिल 1000 रुपिया ले जादा बकाया हे अउ कनेक्शन कट गे हे, त दफ्तर के चक्कर काटे के या लाइनमैन के अगोरे के जरूरत नइ पड़े। स्मार्ट मीटर म लगे एक खास ‘पुश बटन’ ला सिर्फ 30 सेकंड तक दबा के उपभोक्ता मन खुद अपन घर के बिजली चालू कर सकिहें।

नियामक आयोग के सुनवाई म होइस खुलासा राज्य विद्युत नियामक आयोग के सुनवाई म पावर कंपनी के अधिकारी मन ह ए सुविधा के जानकारी दीस। अधिकारी मन के कहना हे कि ये एक अस्थायी राहत आय, जेकर से उपभोक्ता मन ला बिल पटाय बर अऊ समय मिल जाही। फेर, तय समय के भीतर बकाया पईसा पटाना जरूरी होही, नइ त सिस्टम ह फेर ले बिजली काट दहि। ए तकनीक ले मनखे मन ला मानसिक शांति मिलही अउ तुरंत होवइय्या परेशानी ले घलो छुटकारा मिलही।

आयोग ह कंपनी ला लगाईस फटकार प्रदेश म 1000 रुपिया ले जादा बिल बाकी होय म बिजली ला सीधा कंट्रोल रूम ले काट दिय़ा जावत रिहिस। ए बात म विद्युत नियामक आयोग ह संज्ञान लीस अउ कंपनी ले पूछीस कि बिल पटाय के बाद घलो कनेक्शन जोड़े म एतका देरी काबर होथे? तब अधिकारी मन बताइन कि स्मार्ट मीटर म अइसन तकनीक हे कि बिल जमा करे के एक घंटा के भीतर उपभोक्ता ह खुद बिजली बहाल कर सकथे।

परचार-प्रसार करे के निर्देश नियामक आयोग के सचिव एसपी शुक्ला ह बिजली कंपनी के अधिकारी मन ला फटकार लगावत कहिन कि जब ए सुविधा पहिली ले रिहिस, त आम जनता ला एखर बारे म काबर नइ बताय गिस। आयोग ह निर्देश दीस हे कि कंपनी ह ए ‘पुश बटन’ तकनीक के बढ़-चढ़ के परचार करे ताकि सबो ला जानकारी मिल सके। संग म, जब तक आयोग के आखिरी फैसला नइ आ जाय, बकाया पईसा के नाम म कनेक्शन काटे म रोक जारी रही।