Chhattisgarh Coins Found : आरंग : छत्तीसगढ़ के रायपुर जिला के आरंग क्षेत्र के गाँव रीवा म चलत उत्खनन (खुदाई) के काम अब भारी रहस्य के घेरा म आ गे हे। पुरातत्व बिभाग ह पिछले 4-5 बच्छर ले ए जगा म काम करत हे अउ इहाँ ले 10वीं ईसा पूर्व तक के बहुत जुन्ना अवशेष मन लगातार मिलत हें। एमा कुछू धरोहर मन ल तो हड़प्पा संस्कृति के समय ले घलो जोड़े जावत हे, अउ एला सिरपुर के अवशेष मन ले घलो जुन्ना माने जावत हे। ए अमूल्य खोज मन के बीच, बिभाग के चुप रहे ले अब गंभीर सवाल खड़ा हो गे हें।
Chhattisgarh Coins Found : 2500 सिक्का मिले के बात म रहस्य
गाँव वाले मन ले मिले खबर के मुताबिक, रीवा म चलत खुदाई के बखत थोकिन दिन पहिली जुन्ना सिक्का मन के एक बड़े जखीरा मिले हे। बताए जावत हे कि ए सिक्का मन के संख्या लगभग 2000 ले 2500 के बीच हो सकत हे। फेर, ए सिक्का मन के मिले के खबर होए के बाद घलो, पुरातत्व बिभाग ह न तो एखर सही जानकारी दिस अउ न ही एला सार्वजनिक करिस।
गाँव वाले मन अउ इतिहास ल मया करइया मन म ए बात के भारी गुस्सा हे कि आखिर बिभाग ह कोन दबाव के चलते सच्चाई ल लुकावत हे।
बिभाग के काम करे के तरीका उपर भारी सवाल
पुरातत्व बिभाग के ए चुपकी ह ओकर काम करे के तरीका उपर बड़े सवाल खड़ा करत हे। बिभाग ह ए जानकारी ल नइ बतावत हे कि ए सिक्का मन कतेक जुन्ना हें, अउ सबले जरूरी बात, ए मन तांबा, चाँंदी या सोना जइसन कोन धातु ले बने हें।
गाँव वाले मन के कहना हे कि ए चुप रहना इतिहास के ओ पन्ना मन ल दबाए बरोबर लागथे, जे रीवा के माटी म दफन हें अउ छत्तीसगढ़ के जुन्ना गौरव ल हड़प्पाकालीन सभ्यता ले जोड़े के ताकत रखथे।
रीवा म म्यूजियम बनाए के मांग
गाँव वाले मन ह मांग करे हे कि रीवा के ऐतिहासिक महत्व ल देखत, बिभाग ह तुरते इहाँ एक ठन संग्रहालय (म्यूजियम) बनाए। ओमन के कहना हे कि खुदाई म मिले अमूल्य अवशेष मन ल इहीं सुरक्षित राखे जाए, ताकि गाँव के मनखे अउ खोज करइया मन छत्तीसगढ़ के ए जुन्ना गौरव ल नजदीक ले जान सकँय अउ इतिहास ल लुकाए झन जाए।
