छत्तीसगढ़ के साइको किलर: दारू म ज़हर मिलाके पिलावय, मरे के बाद अंतिम संस्कार म घलोक जावय; 8 झन ल खास वजह से मारिस
Balodabazar Crime News : बलौदाबाजार। बलौदाबाजार जिला के कसडोल थाना इलाका के एक ठन सांत गांव ‘पुराना खर्वे’ म बीते चार महीना म जो कुछू होइस, ओकर से पूरा छत्तीसगढ़ कांप गे हे। गांव म एक के बाद एक 8 झन के संदिघ्ध मौत होए घलो ककरो धियान नई गिस, फेर जब पुलिस ह जांच करिस त अइसन सच समने आइस जेकर से सबो के रूंआ ठाढ़ होगे। पुलिस ह गांव के ही 46 बछर के रामसहाय जायसवाल ल धरे हे। ये सिरिफ बदला ले बर अपन ही जान-पहचान के 8 मनखे मन ल मौत के घाट उतार दिस।
आरोपी के दरिंदगी अइसन रहीस कि मनखे मन ल मारे के पहिली ओ ह एक ठन कुकुर ऊपर ज़हरीला सुहागा के टेस्ट करके देखे रहीस। जब कुकुर मर गे, त ओकर बाद ओ ह दारू म सुहागा मिला-मिला के मनखे मन ल पिलाना सुरु करिस। सबले डरावना बात ये हे कि ज़हर देके मारे के बाद, जब पीड़ित मन के तबीयत खराब होवय त आरोपी ह खुद ओ मन ल अस्पताल ले जाए के नाटक करय अउ मरे के बाद ओकर अंतिम संस्कार म घलोक सामिल होवय, ताकि ककरो ओकर ऊपर सख झन होवय।
ककर-ककर अउ काबर लिस जान?
पुलिस के पूछताछ म आरोपी ह कुबूल करिस कि ओ ह हर झन ल अलग-अलग छोटे-छोटे रंजिश के सेती मारिस:
बद्री पटेल (6 फरवरी 2026): ओ ह हमेशा गाली-गलौज करय अउ दारू पिलाए बर दबाव बनावय, एकर सेती ओला पहिली सिकार बनाइस।
बुठालू साहू (20 फरवरी 2026): जुन्ना चुनावी बिवाद अउ समाज ल गाली देके खार खाय रहीस।
छत्तूराम साहू (12 मार्च 2026): आरोपी ल सख रहीस कि छत्तूराम ओकर घरवाली ऊपर खराब नजर रखथे।
बुधराम जायसवाल (20 मार्च 2026): भुइँया (जमीन) के लेन-देन अउ जुन्ना सामाजिक रंजिश के सेती मारिस।
विनोद कुमार साहू (31 मार्च 2026): हमेसा के गाली-गलौज से तंग आके ज़हर वाली दारू पिला दिस।
गजानंद मांझी (28 अप्रैल 2026): आरोपी ल सख रहीस कि गजानंद ओकर ऊपर जादू-टौना (टोना-टोटका) करत हे।
चैतूराम साहू (29 अप्रैल 2026): आरोपी ह ओकर से 50 हजार रूपया उधार ले रहीस, बियाज चुकाए से बांचे बर ओला रसता से हटा दिस।
महेतरूराम साहू (14 मई 2026): साल 2023 के चुनाव के कचाकच अउ ताना मारे के सेती ओकर जान ले लिस।
गांव वाले मन के सख से खुलिस राज
ये खूनी खेल के खुलासा तब होइस जब 6 जून 2026 कूं गांव वाले मन ह पुलिस ल अरजी देके ये संदिघ्ध मौत मन के जांच करे के मांग करिन। गांव वाले मन ल रामसहाय ऊपर पूरा सख रहीस। पुलिस ह मामला ल गंभीरता से लेत हुए 7 झन मरे मनखे मन के लास ल कबर से निकरवाइस अउ पोस्टमार्टम बर रायपुर भेजिस। कड़क पूछताछ के बाद रामसहाय ह अपन गुनाह मान लिस।
एक झन बांच गे
आरोपी ह 14 अप्रैल कूं कार्तिक नाम के एक झन अउ मनखे ल मारे के कोसिस करे रहीस, फेर ओला तुरते अस्पताल ले जाए के सेती ओकर जान बांच गे। अभी पुलिस ह रामसहाय के खिलाफ 8 हत्या अउ एक हत्या के कोसिस के मामला दरज करे हे। जब पुलिस ओला घटना के जगह म लेके गिस, त गांव वाले मन के गुस्सा फूट गिस अउ ओ मन जमकर नाराबाज़ी करिन।
