Balod News : नीम के रुख ले बहे लगिस दूध के धारा, लोगन मन मानत हें देवी के परसाद, पीये बर उमड़िस भीड़
Balod News : बालोद: छत्तीसगढ़ के बालोद जिला ले एक ठन अजब-गजब मामला आगू आई हे। इहाँ के भालुकोंनहा गांव मा एक ठन नीम के रुख (पेड़) ले अचानक सफेद रंग के दूध कस तरल पदारथ बहे लगिस हे। येला देख के लोगन मन अचम्बित हें अउ येला ‘देवी के चमत्कार’ मान के दूर-बिहाण ले पूजा करे बर पहुँचत हें।
का आय पूरा मामला?
ये अजब घटना गांव के कार्तिक राम कुमेटी के खेत मा खड़े नीम के रुख मा होवत हे। गांव वाला मन बतात हें कि रुख ले सफेद रंग के पदारथ लगातार बोहावत हे। बड़े अचम्बो के बात ये हे कि लोगन मन येला खाली देखत भर नई हें, बल्कि ‘देवी के परसाद’ मान के मटका अउ बोतल मा भर-भर के घर ले जावत हें अउ एक-दोसर ला बांटत घलो हें।
नारियल पानी कस लागय स्वाद
रुख ले जो पदारथ निकलत हे, ओखर बारे मा लोगन मन के कहना हे कि ओमा थोकिन गंध (वास) तो हे, फेर चखे मा ओकर स्वाद बिल्कुल नारियल पानी कस मीठ लागय। आस्था अतका बढ़ गे हे कि लोगन मन रुख ला पवित्र धागा मा बांध दीन हें अउ ओती अगरबत्ती जला के पूजा-पाठ घलो शुरू कर दीन हें।
चमत्कार के चर्चा पूरा इलाका मा
जब ले ये ‘दूधिया नीम’ के खबर अउ वीडियो सोशल मीडिया मा फइलीस हे, तब ले भालुकोंनहा गांव मा मनखे मन के तांता लग गे हे। जहाँ लोगन मन येला सरद्धा ले जोड़ के देखत हें, ओती कुछ जानकार मन के कहना हे कि ये ह कउनो कुदरती रासायनिक बदलाव (Chemical Reaction) घलो हो सकत हे। फेर अभी तो पूरा इलाका मा ये रुख ह चर्चा के बिसय बने हुए हे।
