ट्रैफिक पुलिस के गाड़ी ले होइस बड़का हादसा, एक लइका के मउत अउ एक गंभीर
रायपुर। राजधानी रायपुर ले एक ठन बहुते दुखद अउ हिरदे कपा देय वाला खबर आगू आवत हे, जिहां स्कूल जावत दू मासूम लइका मन ह सड़क हादसा के शिकार हो गे हें। ये बड़का दुर्घटना सहर के पॉश इलाका छत्तीसगढ़ क्लब के ठीक आघू होइस। ए भीषण टक्कर म स्कूल जावत एक झन लइका के मउका म ही मउत हो गे, जबकि ओखर संग म रहिस एक ठन नोनी ह गंभीर रूप ले घायल हे। घायल नोनी ला तुरते लगे के अस्पताल म भरती कराये गे हे, जिहां ओखर हालत नाजुक बने हुए हे।
सबले जादा अचरज अउ दुख के बात ये हे कि मासूम मन ला कुचले वाला गाड़ी ह ट्रैफिक पुलिस के ‘टोइंग गाड़ी’ (क्रेन) रिहिस। देखइया मन के कहना हे कि ट्रैफिक पुलिस के ये गाड़ी ह लइका मन ला अपन चपेट म ले लिस। हादसा के तुरंत बाद मउका म चिख-पुकार मच गे अउ अफरा-तफरी के माहौल बन गे। ओते कोती ड्राइवर ह मउका ले फरार हो गे हे।
अभी पुलिस ह मर्ग कायम कर के मृत मासूम के लास ला पीएम बर भेजवा दे हे अउ आघू के कार्रवाई म जुट गे हे। फरार ड्राइवर के खोज-खबर लिय जावत हे।
