छत्तीसगढ़ के मनखे मन ला बिजली के झटका: आज ले प्रति यूनिट देहे बर पड़ही 30 ले 50 पैसा जादा!
CG Power Tariff Hike : रायपुर। छत्तीसगढ़ मा मंहगाई के मार झेलत मनखे मन ला आज ले बिजली के बड़े झटका लगे हे। छत्तीसगढ़ विद्युत नियामक आयोग कोति ले तय बिजली के नवा दर आज ले लागू होगे हे। अब उपभोक्ता मन ला प्रति यूनिट 30 ले 50 पैसा जादा बिल देहे बर पड़ही। पाछू दिन चालू वित्तीय बछर 2026-27 बर बिजली के नवा दर मन के घोषणा करे गे रीहिस।
पाछू बछर घरेलू बिजली मा जिहां 10 ले 20 पैसा के बाढ़त होई रीहिस, ओहा ए पइत 30 ले 50 पैसा बाढ़ गे हे। गैर घरेलू (कमर्शियल) उपभोक्ता मन के बिजली दर मा 20 पैसा ले 40 पैसा प्रति यूनिट के बढ़ोतरी होए हे। खेती-किसानी के पंप मन के दर घलो 40 पैसा प्रति यूनिट महंगा कर दे गे हे। एकर संग च नवा टैरिफ मा कतकोन बदलाव करे गे हे। अब बिजली बिल के अगाऊ (एडवांस) भुगतान करे मा मिलइया 1.25 प्रतिशत के छूट ला घटा के 0.75 प्रतिशत कर दे गे हे।
बिल पटाए मा देरी करे मा घलो नियम बदल गे हे। अब तय समय के बाद बिल जमा करे मा 1.5 प्रतिशत महीना के जगह 0.04 प्रतिशत रोज के हिसाब ले सरचार्ज (हर्जाना) लगाय जाही। एकर अलावा, एलवी-1 अउ एलवी-2 श्रेणी मा मिलइया अस्थायी बिजली कनेक्शन के दर ला घलो बढ़ा दे गे हे, जउन पहले सामान्य दर के 1.25 गुना रीहिस, ओला अब बढ़ा के 1.5 गुना कर दे गे हे।
घरेलू बिजली के पुराना अउ नवा दर:
0 ले 100 यूनिट: पहले रीहिस ₹4.10, अब होगे ₹4.40
101 ले 200 यूनिट: पहले रीहिस ₹4.20, अब होगे ₹4.50
201 ले 400 यूनिट: पहले रीहिस ₹5.60, अब होगे ₹6.00
401 ले 600 यूनिट: पहले रीहिस ₹6.60, अब होगे ₹7.00
601 यूनिट ले जादा: पहले रीहिस ₹8.30, अब होगे ₹8.80
जुन्ना बिल पटाए बर 3 महीना के जादा मोहलत
कबीर जयंती महोत्सव के दिन मुख्यमंत्री विष्णुदेव साय हा घोषणा करे रीहिन कि जिन उपभोक्ता मन के बिजली बिल अब्बड़ दिन ले बाकी हे, ओमन ला बिल पटाए बर 3 महीना के अऊ जादा समय दिए जाही। ए बीच बिल जमा करे मा मनखे मन ले कोनो सरचार्ज नहीं लेवाय जाही, जेकर ले लाखन उपभोक्ता मन ला राहत मिलही।
10 प्रतिशत के विशेष छूट घलो मिलही
मुख्यमंत्री हा बताइन कि सिर्फ़ सरचार्ज माफ़ नहीं करे जाही, बल्कि तय समय के भीतर बकाया बिजली बिल पटाए मा पात्र उपभोक्ता मन ला 10 प्रतिशत के विशेष छूट घलो दिए जाही। एकर ले मनखे मन ला सीधा फायदा मिलही अउ ओमन कम पइसा मा अपन जुन्ना बिल ला पटा सकिहीं।
