कांकेर में अकासी बिजली गिरे से मनरेगा के 2 मजदूर मन के मउका म मउत, 5 घायल
भानुप्रतापपुर। कांकेर जिला के अंतागढ़ थाना इलाका के कलगांव म अकासी बिजली (गाज) गिरे से मनरेगा म काम करत दू झन मजदूर मन के मउका म ही मउत होगे, अउ 5 झन मजदूर मन घायल होगे हें। घटना के जानकारी मिलत कती ले प्रशासन के अधिकारी मन मउका म पहुंच गे हें।
मिले जानकारी के मुताबिक, गांव म मनरेगा योजना के तहत तालाब खने के काम चलत रहिस, जेमा करीब 50 झन मजदूर मन लगे रहिन। एही बीच अचानक मौसम बदलिस अउ पानी गिरे लगिस। पानी ले बचे बर मजदूर मन एक ठन पेड़ के खाले म ठाढ़े रहिन। एही बखत जोर से गाज गिरिस, जेकर चपेट म आये से पेड़ के खाले ठाढ़े उपसरपंच धनराज पटेल अउ एक अउ मजदूर के मउका म ही मउत होगे।
ए दुर्घटना म पांच झन मजदूर घायल घलो होगे हें, जेमा 3 माइलोगन (महिला) अउ 2 पुरूस सामिल हें। घायल मजदूर मन ल इलाज बर अंतागढ़ के सामुदायिक स्वास्थ्य केंद्र म भरती कराये गये हे। बिहनिया-बिहनिया हुये ए घटना ले पूरा जिला म हड़कंप मच गे हे।
घटना के बारे म कलेक्टर निलेश महादेव क्षीरसागर ह बताइन कि मउका म अधिकारी मन ल भेज के स्थिति के जायजा लिये जात हे। घायल मन के बने इलाज के ब्यवस्था करे गये हे अउ एम्बुलेंस ल घलो रवाना कर दिये गिस। संग म डॉक्टर मन ल कड़ा निरदेस दिये गये हे कि घायल मन के इलाज म कोनो कमी नहीं होना चइही।
