बिलासपुर मा आपत्तिजनक टिप्पणी ले उपद्रव, पथराव मा TI के फुटिस मुड़ी
बिलासपुर। सोशल मीडिया में एकउ आपत्तिजनक टिप्पणी के बाद सुकरवार के रात बिलासपुर के खपरगंज अउ मसानगंज इलाका में भारी बवाल होगे। बात एनच बाढ़िस कि दुनो पक्ष आमने-सामने आ गैन अउ जमके पथराव होगे। उपद्रवी मन घर, दुकान अउ गाड़ी-घोड़ा में घलो तोड़फोड़ करिन। माहौल ला संभाले पहुंचे पुलिस वाले मन ऊपर घलो पत्थर बरसाइन, जेमा तारबाहर थाना प्रभारी (TI) रवि तिवारी के मुड़ी फट गे अउ एक आरक्षक संग कतो आऊ लोगन घायल हो गैन।
सोशल मीडिया पोस्ट के सेती विवाद के शुरुआत सिटी कोतवाली क्षेत्र के खपरगंज ले होइस। खबर फैलतेच हिंदूवादी संगठन के लोगन उहां पहुंच गैन। देखते-देखते दुनो कोती ले हाथापाई अउ पथराव सुरू होगे, जेखर ले पूरा इलाका में अफरा-तफरी मच गे।
सुरु में सिर्फ पेट्रोलिंग टीम पहुंचे रिहिस, जेखर से भीड़ बेकाबू होवत गिस। मौका में पहुंचे CSP गगन कुमार संग घलो धक्का-मुक्की अउ हाथापाई होइस। पथराव में TI रवि तिवारी गंभीर रूप ले घायल हो गैन, जिनला अस्पताल लै जाना परिस।
उग्र भीड़ सिटी कोतवाली थाना के भितरी घुस के हंगामा करे लागिस। स्थिति ला काबू करे बर पुलिस ला लाठीचार्ज करे बर परिस अउ आंसू गैस के गोला छोड़े बर परिस। संसाधन कम परे ले सरकंडा TI प्रदीप आर्या ला हाथ ले ही गोला फेंके बर परिस।
मामला ला बढ़ावत देख के जांजगीर-चांपा, मुंगेली अउ CAF ले आऊ पुलिस बल बुलाए गिस। कलेक्टर संजय अग्रवाल अउ एसएसपी रजनेश सिंह खुद हेलमेट पहन के रद्दा में उतरिन अउ रात के तीन बजे तक फ्लैग मार्च करिन। अभी पूरा इलाका पुलिस छावनी बन गे हे अउ 400 ले जादा जवान तैनात करे गैन हवे। प्रशासन ह कहे हे कि गड़बड़ी करे थवई मन ऊपर कड़ी कार्रवाई करे जाही।
