वेदांता पावर प्लांट हादसा: मौतों के आंकड़ा बाढ़ के होइस 14, प्रबंधन ह मृतक के परिजन ला 35 लाख अउ घायल मन ला 15 लाख मुआवजा देय के करिस घोषणा
Vedanta Power Plant : सक्ती, छत्तीसगढ़। सक्ती जिला के सिंघीतराई गांव में स्थित वेदांता पावर प्लांट में मंगलवार के होय बॉयलर ब्लास्ट के घटना ह पूरा प्रदेश ला झकझोर के रख दीस हे। ये बड़े हादसा में मरे वइया मन के संख्या अब बाढ़ के 14 हो गे हे। घायलों मन के संख्या 33 बताए जात हे, जेमने ले 4 झन के हालत जादा गंभीर होय के सेती मनला रायपुर रिफर करे गे हे।
हादसा के बाद प्लांट प्रबंधन ह बड़का घोषणा करे हे। प्रबंधन कोती ले मृतक मन के परिवार ला 35-35 लाख रूपया अउ घायल मन ला 15-15 लाख रूपया के मुआवजा देवाय के बात कहे गे हे। एकर साथे-साथ घायलों के पूरा इलाज अउ मृतक मन के परिवार के एक सदस्य ला प्लांट में नौकरी देय ऊपर घलो सहमति बन गे हे।
ये भीषण हादसा मंगलवार के मंझनिया करीब 3 बजे डभरा थाना इलाका के ग्राम सिंघीतराई में होइस, जब अचानक बॉयलर ह फट गे। ब्लास्ट अतका भयानक रहिस कि प्लांट में अफरा-तफरी मच गे अउ कतको मजदूर एकर चपेट में आ गे। घटना ले गुस्साए परिजन मन ह प्लांट के बाहर जमके हंगामा करिन अउ नारेबाजी घलो करिन।
मुख्यमंत्री विष्णुदेव साय ह ये घटना ऊपर गहरा दुख जतावत मृतक मन के परिवार बर 5-5 लाख रूपया अउ घायल मन बर 50-50 हजार रूपया के सहायता राशि देय के घोषणा करे हें। मुख्यमंत्री ह कड़क निर्देश दे हें कि सबो घायलों के मुफ्त अउ बढ़िया इलाज होय बर चाही।
