वेदांता प्लांट हादसा म मानवाधिकार आयोग के बड़े एक्शन, मुख्य सचिव अउ DGP ला नोटिस जारी, मुआवजा अउ कार्रवाई म मांगे बरवाब
Vedanta Plant Accident Update : रायपुर। सक्ती जिला के वेदांता पावर प्लांट म होय भीषण बॉयलर हादसा ला लेके राष्ट्रीय मानवाधिकार आयोग ह कड़ा रुख अख्तियार करे हे। आयोग ह ए मामला म अपन ले संज्ञान लेवत हुए राज्य के मुख्य सचिव अउ पुलिस महानिदेशक (DGP) ला नोटिस जारी करे हे। आयोग ह दुनो बड़े अधिकारी मन ले दू हफ्ता के भीतर पूरा रिपोर्ट मांगे हे।
आयोग के कहना हे कि जदि मीडिया म आय खबर मन सही हे, त ए मामला पीड़ित मन के मानवाधिकार के गंभीर उल्लंघन आय। नोटिस म ए घलो पूछे गे हे कि मृतक मजदूर मन के परिवार अउ घायल मन ला मुआवजा दे के का स्थिति हे। संग म हादसा म झुलसे 20 मजदूर मन के इलाज अउ ओ मन के सेहत ला लेके घलो जानकारी मांगे गे हे। आयोग ह सरकार ले पूछे हे कि हादसा के जांच कहां तक पहुंचे हे अउ दोषी मन के ऊपर अब तक का कार्रवाई करे गे हे।
बता दन कि 14 अप्रैल के सक्ती जिला के सिंघनातरई गांव म वेदांता पावर प्लांट के बॉयलर यूनिट म ब्लास्ट होय रहिस। ओ बखत वहां 40-50 मजदूर काम करत रहिन। करीब 600 डिग्री सेल्सियस के गरम भाप के चपेट म आय ले अब तक 25 मजदूर मन के मौत हो चुके हे, अउ कतको मनखे मन के इलाज अभी घलो चलत हे।
राज्य सरकार ह ए पूरा मामला के जांच बर बिलासपुर संभागायुक्त ला नियुक्त करे हे अउ 30 दिन म रिपोर्ट मांगे हे। मुख्यमंत्री विष्णुदेव साय ह मृतक मन के परिवार ला 5-5 लाख अउ घायल मन ला 50-50 हजार दे के घलो एलान करे रहिन। प्लांट प्रबंधन ह घलो मृतक मन के परिवार ला 35-35 लाख अउ नौकरी दे के वादा करे हे। अब मानवाधिकार आयोग ह ए पूरा मामला के निगरानी करत हे।
