Union Budget 2026 : अब वित्त मंत्री सुनही आप मन के गोठ, का सस्ता होय अउ का महंगा, सीधा सरकार ला भेजव अपन सुझाव, जानव तरीका
Union Budget 2026 : नई दिल्ली: केंद्र सरकार ह आने वाला बजट 2026-27 बर एक बड़ फैसला लिस हे। अब देश के बजट ह सिरिफ बड़े अधिकारी मन ह मिलके नई बनाय, बल्कि एमा आप मन के घलो राय सामिल रही। वित्त मंत्रालय ह ‘MyGov’ पोर्टल के जरिया देश के जम्मो नागरिक मन ले सुझाव मांगे हे। सरकार के कहना हे कि ‘विकसित भारत’ के सपना तब पूरा होही, जब बजट में आम जनता के आवाज गूंजही।
Union Budget 2026 : कइसे दे सकथव अपन राय? अगर आप मन चाहत हो कि आने वाला साल में रसोई के सामान सस्ता हो जाय, खेती-खिसारी बर जादा सुविधा मिलय या टैक्स में छूट मिलय, त आप मन अपन बात सीधे वित्त मंत्री तक पहुँचा सकथव। एकर बर आप ला MyGov.in वेबसाइट में जाना प़ड़ही या मोबाइल में MyGov ऐप डाउनलोड करना रही। उंहा ‘Union Budget 2026-27’ के बटन ला दबाके अपन मोबाइल नंबर ले लॉग-इन करव अउ कमेंट बॉक्स में अपन मन के बात ला लिख दव। चाहे आप किसान होव, पढ़इया लइका होव या घर चलाय वाली नोनी-बऊ, सब कोई अपन सुझाव दे सकथें।
1 फरवरी ला पेश होही बजट परंपरा के हिसाब ले, वित्त मंत्री निर्मला सीतारमण ह 1 फरवरी 2026 के दिन संसद में देश के बही-खाता (बजट) पेश करही। अभी वित्त मंत्री ह बड़े-बड़े अर्थशास्त्री अउ किसान संगठन मन ले घलो गोठ-बात करत हें। आप मन जे सुझाव देहो, ओला वित्त मंत्रालय के टीम ह पढ़ही अउ जेन बात ह जनहित में रही, ओला बजट में सामिल करे जा सकही।
पिछला बजट (2025-26) में का रहिस खास? पिछला साल के बजट में सरकार ह मध्यम वर्ग के लोगन मन बर टैक्स में राहत दे रहिस। नौकरीपेशा लोगन मन बर ‘स्टैंडर्ड डिडक्शन’ ला बढ़ा दे गे रहिस, जेकर से ओमन के हाथ में जादा पइसा बचिस। साथ ही, खेती-खिसारी ला आधुनिक बनाय अउ गांव-गांव में सड़क बनाए बर घलो रिकॉर्ड पइसा दे गे रहिस। अब ये देखना होही कि ये साल जनता के सुझाव ले बजट में अउ का-का नवा बदलाव आथे।
