Chhattisgarh Politics : भूपेश बघेल के भाजपा उपर बड़का हमला : कहिन- सर्वे कराके डराए के कोसिस करत हें अमित शाह, हमन नई डरन….
Chhattisgarh Politics : रायपुर/दुर्ग: पूर्व मुख्यमंत्री भूपेश बघेल ह केंद्रीय गृह मंत्री अमित शाह उपर बड़ आरोप लगावत कहिन कि भाजपा सरकार ह सर्वे के बहाने ओमन ला डराए अउ बदनाम करे के साजिस रचत हे। दुर्ग जिला में आयोजित एक कार्यक्रम में सामिल होय के बाद बघेल ह मिडिया ले गोठियावत बताइन कि पूरा छत्तीसगढ़ में अमित शाह ह सर्वे करावत हें। ओमन के कहना हे कि भाजपा कतको जुगत लगा ले, फेर कांग्रेस के नेता मन अउ ओमन अइसन डरवाए ले डरने वाला नई हें।
Chhattisgarh Politics : बघेल ह सोशल मीडिया में घलो लिखिन कि गृह मंत्री ह प्रदेश में सर्वे एजेंसी के 70 टीम मन ला भेजे हें, जेमन जगा-जगा जाके लोगन ले पूछत हें कि ‘का भूपेश बघेल ला गिरफ्तार करना चाहिये?’ बघेल के दावा हे कि भिलाई में जब एक टीम के सदस्य मन ला पकड़े गिस, तब ये बात के खुलासा होइस। ओमन कहिन कि कानून के हिसाब ले कार्रवाई करे के जगह अइसन सर्वे कराना ये बताते कि भाजपा ह सिरिफ राजनीतिक बदला ले बर काम करात हे।
read more : SECR Cancelled Trains List : यात्री मन ध्यान देव, छत्तीसगढ़ ले गुजरइया 21 ट्रेन मन हो गे रद्द, देखव लिस्ट
अपन बात ला आगू बढ़ावत पूर्व मुख्यमंत्री ह कहिन कि भाजपा ह पहले महादेव सट्टा एप के नाम लेके ओमन ला बदनाम करिस अउ अब जबरदस्ती शराब घोटाला में घसीटे के कोसिस करे जात हे। बघेल ह भाजपा उपर समाज ला बांटे के घलो आरोप लगाइन। ओमन कहिन कि जब ले भाजपा के सरकार आई हे, तब ले डर अउ लालच के राजनीति करके समाज ला ध्रुवीकृत करे के काम करे जात हे, फेर प्रदेश के जनता सब देखत हे अउ समझत हे।
