टी20 वर्ल्ड कप ट्रॉफी ला मंदिर ले जाय म मचे हे बवाल: कीर्ति आजाद के सवाल ऊपर भड़क गे ईशान किशन
T20 World Cup 2026 : टी20 वर्ल्ड कप 2026 म भारत के ऐतिहासिक जीत के बाद खुसी के माहौल हे, लेकिन ए बीच एक नवा विवाद घलो खड़ा हो गे हे। असल म, न्यूजीलैंड ला हराय के बाद कप्तान सूर्यकुमार यादव, कोच गौतम गंभीर अउ जय शाह ह ट्रॉफी ला धर के अहमदाबाद के हनुमान टेकरी मंदिर म असीरबाद ले बर गे रिहिन। ए बात ऊपर 1983 वर्ल्ड कप के विजेता खिलाड़ी कीर्ति आजाद ह सवाल उठा दे हे, जेखर ऊपर अब टीम के स्टार बल्लेबाज ईशान किशन ह करारा जवाब दे हे।
का रिहिस कीर्ति आजाद के एतराज?
कीर्ति आजाद ह किहिन कि खेल अउ वर्ल्ड कप के ट्रॉफी कोनो एक धरम के नइ होवय, ये ह पूरा देस के होथे। ओमन सवाल करिन कि टीम म सबो धरम के खिलाड़ी हें, त फिर ट्रॉफी ला सिरिफ मंदिर काबर ले जाय गे? ओला मस्जिद, चर्च या गुरुद्वारा काबर नइ ले गेइन? आजाद के कहना रिहिस कि टीम इंडिया ह कोनो एक व्यक्ति के परिवार नइ आय, ये ह पूरा भारत के प्रतिनिधित्व करथे।
ईशान किशन के दो टूक जवाब
जब ईशान किशन ह वर्ल्ड कप जीत के अपन घर पटना चहुँचीन, त मीडिया ह ओखर ले ए विवाद ऊपर सवाल पूछीस। ईशान ह ए सवाल ऊपर भड़क गे अउ किहिन— “हम मन एतका बढ़िया वर्ल्ड कप जीते हवन, आप मन घलो कुछु अच्छे सवाल पूछव। अब कीर्ति आजाद ह का किहिस हे, ओखर ऊपर मैं का बोलूँ?” ईशान ह साफ कर दिस कि अभी बखत विवाद के नइ, बल्कि जीत के जसन मनाय के आय।
वर्ल्ड कप म ईशान के बल्ला ह उगलिस आग
ईशान किशन बर ये वर्ल्ड कप बहुत यादगार रिहिस। ओ ह भारत कोती ले सबले जादा रन बनाय वाला दूसरा बल्लेबाज रिहिस। ईशान ह 9 मैच म 317 रन बनाइस, जेम 3 अर्धशतक शामिल रिहिन। फाइनल मैच म घलो ओखर बल्ला जम के गरजिस अउ ओ ह शानदार अर्धशतक जमाइस।
