पेट्रोल-डीजल के दाम म फेर लगिस आग : 10 दिन म चौथा बार बढ़िस कीमत, आम जनता के जेम म भारी बोझ
Petrol Diesel Price Hike : नई दिल्ली। देस म पेट्रोल अउ डीजल के कीमत म लगातार होवत बढ़ोत्तरी ह आम लोगन के बजट बिगाड़ के रख दरीस हे. सोमवार के एक बार फिर तेल के दाम म गजब उछाल आए हे, जेकर से पेट्रोल 2.61 रुपिया अउ डीजल 2.71 रुपिया प्रति लीटर महंगा हो गे हे. सबले बड़े बात ए हे कि पिछले सिरफ 10 दिन के भीतर ए चौथी बार हे जब तेल के दाम ह बढ़िस हे. एखर पहिली 15 मई के 3-3 रुपिया, 19 मई के 90 पैसा, अउ 23 मई के पेट्रोल 87 पैसा व डीजल 91 पैसा प्रति लीटर महंगा होय रहीस.
ए नवा बढ़ोत्तरी के बाद देस के राजधानी दिल्ली म अब पेट्रोल 102.12 रुपिया अउ डीजल 95.20 रुपिया प्रति लीटर म पहुंच गे हे. उहें अउ दूसर बड़े सहर मन के बात करन त मुंबई म पेट्रोल 111.21 रुपिया अउ डीजल 97.83 रुपिया, कोलकाता म पेट्रोल 113.51 रुपिया अउ डीजल 99.82 रुपिया, अउ चेन्नई म पेट्रोल 107.77 रुपिया अउ डीजल 99.55 रुपिया प्रति लीटर के भाव म बिकत हे. एखर अलावा भोपाल म पेट्रोल के कीमत 114.57 रुपिया अउ नोएडा म 102.12 रुपिया प्रति लीटर तक जा पहुंचे हे.
गजब के बात ए हे कि एक कोती जहां देस म तेल के कीमत ह आसमान छुवत हे, त उहें अंतररास्ट्रीय बजार म कइचा तेल (क्रूड ऑयल) के दाम म भारी गिरावट आई हे. ब्रेंट क्रूड ऑयल 4.75 फीसदी टूटके 100 डॉलर ले नीचे यानी 98.62 डॉलर प्रति बैरल म आ गे हे. तेल के ए नवा दाम बढ़े ले अब माल ढोना, बस-ऑटो अउ इसकूल वैन के किराया बढ़े के पूरा संका हे, जेकर सोझा असर आवन वाले दिन म फल, सबजी, रासन अउ अनाज के दाम म घलो देखे बर मिल सकत हे.
