रायपुर में आज भारत-न्यूजीलैंड के बीच दूसरा टी-20, जानव का-का हे तैयारी अउ कतका हे समोसा-चाय के रेट
रायपुर। छत्तीसगढ़ के राजधानी रायपुर के वीर नारायण सिंह इंटरनेशनल स्टेडियम में आज यानी 23 जनवरी के भारत अउ न्यूजीलैंड के बीच टी-20 सीरीज के दूसरा मुकाबला खेले जाही। आईसीसी टी-20 वर्ल्ड कप ले पहिली होवत ये सीरीज में टीम इंडिया ह गजब के फॉर्म में हे। पहिली मैच में 238 रन ठोकने के बाद अब रायपुर के मैदान में घलो चौका-छक्का के बरसात होय के पूरा उम्मीद हे।
मैच देखे बर दूर-दराज ले आवइया मनखे मन बर ट्रैफिक पुलिस ह अलग-अलग रूट अउ पार्किंग के व्यवस्था करे हे। रायपुर शहर ले जतका दर्शक जाही, ओ मन तेलीबांधा ले सेरीखेड़ी ओवरब्रिज होके नया रायपुर मार्ग ले स्टेडियम पहुंचही। बिलासपुर अउ बलौदाबाजार डहर ले आवइया मन मंदिर हसौद होके नवागांव डहर ले परसदा अउ कोसा पार्किंग में गाड़ी खड़ी कर सकही। जतका मनखे मन जगदलपुर अउ धमतरी डहर ले आवत हें, ओ मन अभनपुर ले होके सेंध तालाब पार्किंग डहर जाही।
स्टेडियम के भीतर खाय-पिये के चीज मन के रेट घलो तय कर दे गे हे ताकि कोनो मनमानी झन कर सकय। समोसा ₹50, सैंडविच ₹60 अउ पानी के बोतल ₹10 में मिलही। रेट के जानकारी बर दुकान के मनखे मन के टी-शर्ट में घलो दाम लिखे रही। सुरक्षा के सेती बोतल, लाइटर, हेलमेट, पावर बैंक अउ सिक्का कस चीज मन ला अंदर ले जाय के मनाही हे। शाम 7 बजे मैच शुरू होही अउ पहली पारी के खत्म होवत ले ही एंट्री मिलही, ओकर बाद गेट बंद कर दे जाही।
