दुर्ग मा राजधानी एक्सप्रेस ऊपर पथरा बाजी: बाल-बाल बचिन ड्राइवर मन, इंजन के कांच ह घलो फुट गे
Rajdhani Express Stone Pelting : दुर्ग। दुर्ग जिला मा एक बार फिर ले ट्रेन ऊपर पथरा फेंके के खबर आगू आई हे। खुर्सीपार गेट अउ पावर हाउस के बीच मा कुछु अंजान मनखे मन ह राजधानी एक्सप्रेस ऊपर पथरा ले हमला कर दिन। ये पथरा बाजी मा ट्रेन के इंजन के आगू वाला कांच ह दरक गे हे। गनीमत रिहिस कि लोको पायलट अउ सहायक लोको पायलट ल कतहुं चोट नहीं आईस, नहीं तो बड़ भारी अनहोनी हो सकत रिहिस।
जैसे ही पथरा बाजी होईस, ड्राइवर ह तुंरत एकर जानकारी रेलवे सुरक्षा बल (RPF) ल दिस। खबर मिलते ही आरपीएफ के टीम हरकत मा आईस अउ अज्ञात मनखे मन के खिलाफ केस दर्ज करके ओ मन के खोज-खबर सुरु कर दिस हे। पथरा बाजी के बाद थोरिक देर बर उहां हड़कंप मच गे रिहिस, फेर बाद मा ट्रेन ल सुरक्षित आगे बर रवाना कर दी गईस।
बता दन कि खुर्सीपार इलाका मा ये पहिली बार नई ये, एकर ले पहिली वंदेभारत एक्सप्रेस ऊपर घलो पथरा फेंके गे रिहिस। ओ बखत आरपीएफ ह एक झन लइका ल धर के कार्रवाई घलो करे रिहिस। बार-बार होवत अइसन घटना मन ह अब रेलवे के सुरक्षा ऊपर सवाल खड़े कर दे हे। अभी पुलिस अउ आरपीएफ के टीम ह ट्रैक के आसपास के बस्ती मन मा छानबीन करत हें। अधिकारी मन के कहना हे कि जल्दी ही आरोपी मन ल धर लई जाही।
