रायपुर के पेट्रोल पंप में हंगामा: पेट्रोल में पानी मिले के शिकायत के बाद खलबली, सप्लाई रोके गिस
Raipur Petrol Pump Case : राजधानी रायपुर के एक बड़े पेट्रोल पंप में ओ समय भारी हंगामा मच गे, जब पेट्रोल भरवाए के तुरंत बाद कई झन के गाड़ी मन रस्ता में झटका खाके बंद होए लगिन। मामला तेलीबांधा इलाका के ‘जय जवान पेट्रोल पंप’ के ए। गाड़ी बंद होए के बाद जब चालक मन मैकेनिक करा गीन, तब पता चRaipur Petrol Pump Caseलिस कि पेट्रोल टैंक में भारी मात्रा में पानी भरे हे। एखर बाद गुस्साए लोगन मन पेट्रोल पंप पहुंच के हल्ला-गुहार शुरू कर दिन।
गाड़ी मन रस्ता में भइन ठाढ़, तब खुलिस पोल
सोमवार के ये घटना ए। प्रत्यक्षदर्शी मन बताईन कि तेलीबांधा जइसन भीड़-भाड़ वाले जगह में बने ए पेट्रोल पंप ले जतके लोगन मन पेट्रोल भरवा के निकलत रहिन, ओमन के गाड़ी कुछू दूर जाके बंद हो जावत रहिस। पहिली त लोगन मन ला लगिस कि गाड़ी में कुछू खराबी आ गे हे, फेर जब एक के बाद एक कई गाड़ियां बंद होए लगिन, तब लोगन मन ला सक होइस। मैकेनिक मन जब पेट्रोल टंकी ला खाली करिन, त ओमा पेट्रोल के जगह पानी भरे रहिस। ए बात के पता चलत च लोगन मन पेट्रोल पंप में जुट गीन अउ कड़ा विरोध शुरू कर दिन।
पंप संचालक ह तुरंत रोकिस सप्लाई, पइसा घलो लहुटाइन
माहौल ला बिगड़त अउ लोगन मन के गुस्सा ला देखत हुए पेट्रोल पंप के संचालक सुभाष शर्मा ह तुरंत एैहतियाती कदम उठाइन। ओमन ओ मशीन (डिस्पेंसर) ले पेट्रोल बेचना तुरंत बंद करवा दिन। संग च, जिन ग्राहक मन के गाड़ी में पानी वाला पेट्रोल डलाए रहिस, ओमन के पइसा घलो तुरंत रिफंड (वापस) कर दिए गिस। संचालक ह बताइस कि गड़बड़ी कइसन होइस, एखर अभी पता नई च चले हे, फेर जांच करवाए जावत हे।
इंडियन ऑयल ला दिए गिस सूचना, जांच के बाद च चालू होही सप्लाई
पंप प्रबंधन डहार ले ए घटना के अधिकारिक सूचना ‘इंडियन ऑयल कॉरपोरेशन’ (Indian Oil) ला भेज दिए गे हे। कंपनी के तकनीकी टीम अउ कांट्रेक्टर मन ला मौका में बुलाए गे हे, ताकि ए बात के पता चल सके कि पेट्रोल में पानी कइसन अउ कहाँ ले आइस। हालांकि, देर रात तक कांट्रेक्टर मन नई पहुंचे रहिन, जेखर से जांच के काम शुरू नई हो पाए रहिस। प्रबंधन के कहना हे कि जब तक पूरा जांच नई हो जाही अउ खराबी ठीक नई होही, तब तक ओ मशीन ले पेट्रोल के सप्लाई बंद च राखे जाही।
ग्राहक मन में गुस्सा: खाली पइसा लहुटाए ले नई होही भरपाई
पइसा वापस मिले के बाद घलो ग्राहक मन के गुस्सा सांत नई होए हे। लोगन मन के कहना हे कि सिरिफ़ पेट्रोल के पइसा वापस करे ले नुकसान के भरपाई नई होही, काबर कि पानी डलाए के सेती ओमन के गाड़ी के इंजन खराब हो गे हे अउ ओमन ला गाड़ी बनावाए बर वर्कशॉप ले जाना पड़त हे, जेमा अलग ले खरचा होही। लोगन मन ए पूरे मामला के निष्पक्ष जांच अउ दोसी मन ऊपर कड़ा कार्रवाई के मांग करत हें।
पानी मिले के का हो सकत हे तकनीकी कारन?
जानकार मन के कहना हे कि पेट्रोल पंप के जमीन के भीतर बने स्टोरेज टैंक में पानी रिसने के कुछ तकनीकी कारन हो सकत हें:
पानी अउ बरसात के दिन में अगर टैंक के ढक्कन या सील ढीली रहिथे, त पानी भीतर चले जाथे।
अगर जमीन के भीतर बने टंकी अब्बड़ पुराना हे अउ ओमा दरार (क्रैक) आ गे हे, त बाहिर के भूजल भीतर रिस जाथे।
कई बार टैंकर ले पेट्रोल खाली करे के समय घलो गड़बड़ी के सेती पानी मिल जाथे।
