रायपुर सेंट्रल जेल म बंद छात्र ला NEET परीक्षा दे के मिलिस अनुमति
NEET Exam : रायपुर। रायपुर सेंट्रल जेल म बंद एक झन छात्र ला आघू होवै वाले NEET परीक्षा म सामिल होवै के अनुमति मिल गे हे। रायपुर के खमतराई थाना इलाका के एक मामला म बंद छात्र कुणाल तरुनाकर कोति ले दायर करे गे याचिका ऊपर सुनवायी करत छत्तीसगढ़ हाईकोर्ट के मुख्य न्यायाधीश न्यायमूर्ति रमेश सिन्हा ह ओकर पढ़ाई-लिखाई के भबिस्य ला धियान म राखत ए राहत दे हें।
कोर्ट ह रायपुर संभागायुक्त अउ जेल अधीक्षक ला निरदेस दे हे कि छात्र ला कड़ा सुरक्षा अउ पुलिस देखरेख म परीक्षा केंद्र तक पहुंचाय जाय अउ परीक्षा सिराय के बाद वापस जेल लाय जाय। छात्र के खिलाफ दरज मामला म अभी तक पुलिस कोति ले चालान (चार्जशीट) पेस नहीं करे गे हे। ए बात ला देखत हुए हाईकोर्ट ह मामला के अगली सुनवायी तीन हफ्ता बाद तय करे हे।
सुनवायी के बेरा छात्र कोति ले अधिवक्ता अनुकूल विश्वास ह अंतरिम आवेदन पेस करके अस्थायी जमानत के मांग करे रहिन। ओमन कोर्ट ला बताइन कि छात्र के NEET परीक्षा 21 जून 2026 ला रायपुर के केंद्रीय विद्यालय म होना हे अउ एकर सबूत बर परवेस पत्र (एडमिट कार्ड) घलो पेस करिन। मामला ऊपर बिचार करत हाईकोर्ट ह परीक्षा म सामिल होवै के अनुमति देवै के संग जेल परासासन ला ए घलो निरदेस दीस कि छात्र ला जेल भितरी जरूरी पढ़ाई के सामान अउ किताब-कापी उपलब्ध कराय जाय, ताकि वो परीक्षा के बचे हुए तैयारी ला कर सके।
