नसा मा धुत स्कूल ड्राइवर के लापरवाही: बस ह ट्रक ल पाछू ले मारिस टक्कर, कतकोन लइका मन घायल, स्कूल प्रबंधन ऊपर भड़किन दाई-ददा मन
आरंग। आरंग इलाका मा आज बिहनिया एक बड़े सड़क हादसा हो गे। ग्राम उमरिया मा स्थित वेंकटेश्वर सिग्नेचर स्कूल के एक तेज रफ्तार बस ह अपन आगू चलत ट्रक ल पाछू ले जोर से टक्कर मार दीस। ए हादसा मा बस मा बईठे कतकोन स्कूली लइका मन ल चोट आए हे। सबले बड़े बात ये हे कि बस के ड्राइवर अउ ओखर संगी, दोनों शराब के नसा मा धुत रिहिन।
नसा मा चूर ड्राइवर, रफ्तार के कहर बताय जावत हे कि ए बस ह महासमुंद अउ आरंग क्षेत्र के लइका मन ल लेके स्कूल जावत रिहिस। नसा के हालत मा ड्राइवर ह बस ल अतका तेज चलावत रिहिस कि ओखर ले कंट्रोल छूट गे अउ बस ह सीधा ट्रक के पाछू जा के घुस गे।
अस्पताल के जगा स्कूल ले गे गे लइका मन ल: फूटीस गुस्सा हादसा के बाद स्कूल प्रबंधन के भारी लापरवाही देखे बर मिलीस। घायल लइका मन ल तुरंत अस्पताल ले जाय के जगा, प्रबंधन ह ओमन ल चुपचाप स्कूल परिसर ले गे। जब ए बात के जानकारी लइका मन के दाई-दादा मन ल मिलीस, त ओमन के गुस्सा फूट पड़ीस। परिजन मन ह स्कूल पहुंच के हंगामा करिन अउ आरोप लगाइन कि स्कूल ह लइका मन के जान के साथ खिलवाड़ करत हे। पालकों के सीधा सवाल हे कि आखिर एक पियक्कड़ ड्राइवर ल लइका मन के सुरक्षा के जिम्मेदारी कइसे दे गे?
पुलिस के कार्रवाई अउ जांच घटना के सूचना मिलत ही आरंग पुलिस के टीम ह मौका मा पहुंच गे हे। पुलिस ह मामला के जांच शुरू कर दे हे। अभी ए पूरा मामला मा स्कूल प्रबंधन ह कुछू बोले ले बचती हे। गांव वाले अउ परिजन मन अब दोषी ड्राइवर अउ स्कूल प्रबंधन ऊपर कड़ा कानूनी कार्रवाई के मांग करत हें।
