विधायक के गिरफ्तारी बर अड़गे तहसीलदार, आज ले छत्तीसगढ़ में सबो काम-बूता ठप, अनिश्चितकालीन हड़ताल सुरू

Tehsildar Strike : रायपुर। छत्तीसगढ़ में आज ले सरकारी अउ राजस्व से जुड़े सबो काम-बूता पूरा तरीका ले ठप होए जावत हे। सरगुजा संभाग में होए गदर के बाद अब पहिली बेर पूरा प्रदेश भर के तहसीलदार अउ नायब तहसीलदार आज (1 जून) ले अनिश्चितकालीन हड़ताल ऊपर चले गए हें। छत्तीसगढ़ कनिष्ठ प्रशासनिक सेवा संघ के नेवता ऊपर राज्य के जम्मो राजस्व अधिकारी सामूहिक छुट्टी पर रहिहीं। अधिकारी मन के साफ कहना हे कि जब तक मुख्य आरोपी मन के गिरफ्तारी नहीं होही, तब तक ओमन काम पर वापस नहीं लवटें।

जानव का ए पूरा कचाकच?

ए पूरा मामला मैनपाट के राजापुर उप तहसील के ए। आरोप हे कि बीते 27 मई के सीतापुर के भाजपा विधायक रामकुमार टोप्पो के चचेरी बहिनी सीमा धनकी जमीन से जुड़े कोनो कागज-पतर में दफ्तर में दस्तखत करावे बर पहुंचे रिहिस। काम में देरी ल लेके नायब तहसीलदार तुषार मानिक अउ सीमा धनकी के बीच कहा-सुनी होगे।

अधिकारी मन के शिकायत के मुताबिक, एकर बाद भाजपा विधायक अपन कार्यकर्ता मन के संग उप तहसील कार्यालय पहुंच गे। आरोप हे कि उहां विधायक अउ ओकर आदमी मन ह नायब तहसीलदार तुषार मानिक के संग मारपीट अउ बदसलूकी करिन, जेमा बीच-बचाव करे बर आए एसडीएम फागेश सिन्हा ल घलो बीच में कूदना पड़िस।

दोनों कोति ले दर्ज हो चुके हे काउंटर FIR

ए बड़े मामला में पुलिस ह दोनों डहर के शिकायत ऊपर एक-दूसर के खिलाफ एफआईआर दर्ज करे हे:

• प्रशासन कोति ले: नायब तहसीलदार के शिकायत ऊपर भाजपा विधायक रामकुमार टोप्पो, यूसुफ, नाजिम राजा, पंकज गुप्ता अउ करीब 10 झन मन के खिलाफ सरकारी काम में बाधा डारे अउ मारपीट (बीएनएस के धारा 221, 191) के केस दर्ज करे गए हे।

• विधायक कोति ले: विधायक के चचेरी बहिनी के शिकायत ऊपर नायब तहसीलदार तुषार मानिक के खिलाफ घलो माईलोगन मन से अभद्रता करे, सार्वजनिक जगह में अश्लीलता फैलाए अउ धमकी देवे (बीएनएस के धारा 79, 296, 351) के मामला दर्ज करे गए हे।

आर-पार के लड़ाई के मूड में अधिकारी

एकर पहिली 29 मई के घलो प्रदेश के 500 ले जादा तहसीलदार मन सामूहिक छुट्टी लेके शांति से प्रदर्शन करे रिहिन। संघ के कहना हे कि अल्टीमेटम देवे के बाद घलो विधायक अउ ओकर संगी मन ऊपर अभी तक कोनो कड़क कार्रवाई नहीं होए हे। अधिकारी मन के कहना हे कि अगर मजिस्ट्रेट स्तर के अफसर मन के संग अइसन घटना होही अउ तुरंत एक्शन नहीं लिए जाही, त फील्ड में काम करे वैया कर्मचारी मन के हिम्मत टूट जाही अउ ओमन डर के मारे काम नहीं कर पाहीं। खैर, ए बड़े हड़ताल के सेती आज ले आम जनता के जाति, निवास, आय प्रमाण पत्र अउ जमीन के रजिस्ट्री-नामांतरण जैसे जरूरी काम अटकना तय हे।