मुंगेली पुलिस के ‘ऑपरेशन बाज’: भाजपा पार्षद समेत 5 झन धराईन, 2.65 लाखों के ब्राउन शुगर जप्त
Mungeli News : मुंगेली। भारत सरकार के “नसा मुक्त भारत पखवाड़ा” अभियान के तहत मुंगेली पुलिस ह सूखे नसा के काला कारोबार करइया मन ऊपर बड़ कार्रवाई करे हे। ‘ऑपरेशन बाज’ के तहत पुलिस ह 5 झन आरोपी मन ला गिरफ्तार करे हे, जेमं एक झन भाजपा के पार्षद घलो सामिल हे। पकड़े गे आरोपी मन म जरहागांव नगर पंचायत के पार्षद लोकेश उर्फ लक्की कश्यप के नांव घलो हे।
शमसान घाट म चलत रहिस नसा के खेल
वरिष्ठ पुलिस अधीक्षक भोजराम पटेल के निर्देश म 1 मार्च के पुलिस ला सूचना मिलीस कि जरहागांव के शमसान घाट तीर कुछ जुवान मन अवैध ब्राउन शुगर बेचे बर जुटे हें। खबर मिलत ही साइबर सेल अउ जरहागांव थाना के संयुक्त टीम ह घेराबंदी करके रेड मारिस। मौका ले पुलिस ह समीर कश्यप, सियाराम, विरेन्द्र, लोकेश अउ रविशंकर ला धर दबोचिस।
का-का मिलीस मौका ले?
तलासी लेय म आरोपी मन के तीर ले अलग-अलग पुड़िया म 53.51 ग्राम ब्राउन शुगर बरामद होय हे, जेकर कीमत करीबन 2,65,000 रुपिया बताय जावत हे। एखर अलावा पुलिस ह:
6 नग मोबाइल फोन (कीमत 50,000)
एक होण्डा साइन मोटरसाइकिल (कीमत 65,000)
एक इलेक्ट्रॉनिक तौल मशीन (कीमत 1,000)
सब्बो मिला के कुल 3,81,000 रुपिया के सामान जप्त करे गे हे।
यूपी के प्रयागराज ले आवत रहिस खेप
पूछताछ म मुख्य आरोपी समीर कश्यप ह बताय हे कि ओ ह उत्तर प्रदेश के नैनी प्रयागराज ले नगद अउ ऑनलाइन पइसा पटा के ब्राउन शुगर लावत रहिस अउ अपन संगी मन के साथ मिलके स्थानीय इलाका म बेंचत रहिस। पुलिस अब ये नेटवर्क ले जुड़े आन मनखे मन के पता लगावत हे।
जेल भेजिन आरोपी मन ला
पुलिस ह सब्बो पांचों आरोपी मन ऊपर एनडीपीएस एक्ट के धारा 21 (ख) के तहत मामला दर्ज करके ओ मन ला न्यायालय म पेस करिस, जहां ले ओ मन ला जेल भेज दिये गे हे। एसएसपी भोजराम पटेल ह अपील करे हे कि अगर कउनों ला नसा के कारोबार के जानकारी मिलय, त फउरन पुलिस ला बतावंय, ओ मन के नांव ला गुप्त रखे जाही।
