बलरामपुर मा बड़े हादसा: स्कूल के छज्जा गिरे ले लइका के मौत, प्रधान पाठक सस्पेंड, शिक्षक मन ला नोटिस

Balrampur School Accident : बलरामपुर: वाड्रफनगर इलाका के शारदापुर गांव मा एक ठन बहुते पीरा दायक घटना हो गे हे। इहाँ के माध्यमिक शाला मा पढ़इया छठवीं कक्षा के लइका आलोक कुमार के निर्माणाधीन आंगनबाड़ी भवन के छज्जा गिरे ले दब के मौत हो गे। ये मामला मा संयुक्त संचालक ह कड़ा कदम उठावत प्रधान पाठक ममता गुप्ता ला सस्पेंड कर दी हे, अउ बाकी शिक्षक मन ला ‘कारण बताओ’ नोटिस जारी करे गे हे।

Balrampur School Accident : का होय रहीस घटना?
जानकारी के मुताबिक, ये घटना शारदापुर के खुटहन पारा स्कूल के आय। मंझनिया मा जब छुट्टी (मध्याह्न भोजन अवकाश) होईस, त आलोक ह खेलत-खेलत स्कूल के पाछू बनत नवा भवन डहर चल दईस। ओती खेलत बखत अचानक छत के छज्जा ह ओखर ऊपर गिर गे अउ आलोक ह ओमा दब गे।

जब आन लइका मन ह हल्ला करिन, त शिक्षक मन ओती दौड़ के गीन। आलोक ह पूरा खून मा लथपथ मलबे मा दबे रहीस। गांव वाला मन के मदद ले ओला अस्पताल ले जाय गीस, फेर डॉक्टर मन ह ओला मृत घोषित कर दीं।

परिजनों के गुस्सा अउ कार्रवाई
ये घटना ले लइका के दाई-ददा अउ पूरा गांव मा भारी गुस्सा रहीस। घर वाला मन के कहना रहीस कि जब तक दोषी शिक्षक अउ भवन बनाइया मन ऊपर कार्रवाई नहीं होही, तब तक ओ मन लइका के अंतिम संस्कार नहीं करहीं। अब प्रधान पाठक ऊपर गाज गिरे के बाद कहे जावत हे कि लइका के क्रिया-करम करे जा सकत हे। प्रशासन ह येला भारी लापरवाही माने हे कि स्कूल परिसर मा बनत भवन के सुरक्षा बर कउनो इंतजाम नहीं रहीस।