KCC लोन बर RBI के नवा ड्राफ्ट: अब 6 साल में चुका सकहू करजा, खेती-खारी के नवा तकनीक बर घलो मिलही पैसा
KCC Loan Rules : मुंबई. किसान क्रेडिट कार्ड (KCC) ले लोन लेवइया किसान मन बर एक बड़ नीक खबर आई हे. भारतीय रिजर्व बैंक (RBI) ह ए योजना ला अउ बेहतर बनाए बर नवा नियम के ड्राफ्ट जारी करे हे. ए नवा बदलाव ले किसान मन ला करजा चुकाय बर जादा समय मिलही अउ खेती-खारी में नवा तकनीक के प्रयोग घलो आसान हो जाही. RBI ह ए नियम मन बर 6 मार्च 2026 तक लोगन मन ले सुझाव घलो मांगे हे.
अब 6 साल में चुका सकहू लोन
नवा ड्राफ्ट के मुताबिक, किसान अब KCC लोन ला 6 साल तक के समय में चुका सकहीं. पहिली ए समय कम होवत रिहिस, जेकर से किसान मन ऊपर जल्दी पैसा लौटाए के दबाव रहय. अब जादा समय मिले ले लोन चुकाना अउ आसान हो जाही. एकरे संग, अब छोटी फसल बर 12 महीना अउ लंबी फसल बर 18 महीना के समय तय करे गे हे, जउन पूरा देश में एक बराबर लागू रही.
खेती के संग तकनीक बर घलो पैसा
अब KCC के पैसा ले किसान मन सिर्फ खाद-बीज नई, बल्कि खेती के नवा तकनीक ऊपर घलो खर्च कर सकहीं. अब लोन में ये सब सुविधा मन शामिल रही:
माटी (मिट्टी) के जांच के खरचा.
मौसम के जानकारी लेवे के मशीन.
ऑर्गेनिक खेती के सर्टिफिकेट बर खरचा.
आधुनिक खेती ले जुड़े ट्रेनिंग.
किसान मन ला का फायदा होही?
ए नवा नियम ले किसान मन ला साहूकार मन ले करजा ले के जरूरत नई पढ़य. अब लोन के राशि खेती के असली खरचा के हिसाब ले तय होही, जेकर से किसान मन ला पूरा पैसा मिलही. RBI के ए कदम ले खेती-खारी ह अउ सुरक्षित अउ फायदा के सौदा बनही.
