खरसिया कार्बन प्लांट हादसा: 4 झन के मौत ले मचीस हड़कंप, मुआवजा बर नेशनल हाईवे म शव रख के चक्काजाम
रायगढ़। खरसिया के मंगल कार्बन प्लांट म होय भीषण ब्लास्ट म अब तक 4 झन के जान जा चुके हे। रायपुर म इलाज के दौरान 9 महिना के लइका के बाद ओकर ददा, दादा अउ एक अउ जवान ह दम तोड़ दीस। एक ही परिवार के तीन सदस्य मन के मौत ले गांव वाला मन के गुस्सा फूट परिस हे अउ ओमन नेशनल हाईवे म लाश रख के चक्काजाम कर दे हें।
बताय जात हे कि 5 फरवरी के बानीपाथर स्थित ए प्लांट म बिना ठंडा करे फर्नेस ला खोल दे गे रहिस, जेकर ले निकले आगी म 8 मजदूर झुलस गे रहिन। इलाज के दौरान भूमि खड़िया (9 माह), ओकर ददा शिव खड़िया (27 साल), साहेब लाल खड़िया (45 साल) अउ इंदीवर (19 साल) के मौत होगे। एक ही घर के तीन पीढ़ी के खत्म होय ले पूरा इलाका म मातम छा गे हे।
गांव वाला मन के मांग हे कि हर मृतक के परिवार ला 50-50 लाख रुपया मुआवजा अउ घर के एक सदस्य ला सरकारी नौकरी दे जाय। ओमन के ये घलो आरोप हे कि प्लांट प्रबंधन ह FIR वापस ले बर दबाव बनावत हे। चक्काजाम के खबर पा के रायगढ़ कलेक्टर मयंक चतुर्वेदी अउ भारी संख्या म पुलिस बल मउका म पहुंच गे हें अउ लोगन मन ला समझाए के कोशिश करत हें।
