एमबीबीएस एडमिशन 2026: रायपुर के जेएनएम मेडिकल कॉलेज म 20 सीट बढ़िस
JNM Medical College Raipur MBBS Seats : छत्तीसगढ़ के मेडिकल के पढ़ाई करेइय्या लइका मन बर एक ठो बड़े अउ खुसखबरी के खबर हे। राष्ट्रीय आयुर्विज्ञान आयोग (एनएमसी) के मेडिकल असेसमेंट एंड रेटिंग बोर्ड (एमएआरबी) ह रायपुर के पंडित जवाहरलाल नेहरू मेमोरियल (जेएनएम) मेडिकल कॉलेज म एमबीबीएस के सीट मन ला बढ़ाए के मंजूरी दे दे हे। नवा अकादमिक सत्र 2026-27 से अब कॉलेज म एमबीबीएस के सीट ह 230 से बढ़के 250 हो जाही। यानी अब हर बछर 20 अउ जादा लइका मन ला डॉक्टर बने के पढ़ई करे के मउका मिलही।
एनएमसी ले मिलीस मंजूरी, अब 250 लइका मन पाही दाखिला
एमएआरबी कोति ले जारी अनुमति चिठ्ठी के मुताबिक, जेएनएम मेडिकल कॉलेज म अब 250 एमबीबीएस छात्र मन ला परवेस मिल सकही। ये कॉलेज ह पं. दीनदयाल उपाध्याय मेमोरियल हेल्थ साइंसेज एंड आयुष यूनिवर्सिटी, छत्तीसगढ़ ले जुड़े हे। सीट बढ़े ले हमर राज के मेडिकल पढ़ई के ढांचा अउ मजबूत होही।
63 बछर म 60 ले 250 सीट तक के सफर: बछर 1963 म सिरिफ 60 एमबीबीएस सीट के संग सुरु होए ये जेएनएम मेडिकल कॉलेज ह समे के साथ अपन छमता ला लगातार बढ़ाए हे। पहिली सीट के संख्या 100 होईस, ओकर बाद बछर 2009 म 150, 2019 म 180, 2023 म 230 अउ अब 2026-27 के सत्र ले ये बढ़के 250 हो जाही। ये बढ़त ह कॉलेज के बढ़िया पढ़ाई अउ अक्छ्छी चिकित्सा ब्यवस्था ला देखाथे।
मेडिकल पढ़ेइय्या मन ला होही बड़े फायदा, सुवास्थ मंत्री ह जताइन खुसी
सीट मन के संख्या बढ़े ले प्रदेश के ओ लइका मन ला बड़े लाभ मिलही, जऊन मन हर बछर एमबीबीएस म परवेस बर कड़ा मिहनत अउ कंपटीशन करथें। अब जादा लइका मन ला अपन ही राज म मेडिकल के पढ़ाई करे के मउका मिलही, जेकर से दूसर राज म जाए के जरूरत कम हो जाही।
सुवास्थ मंत्री ह जताइन खुसी: सुवास्थ मंत्री श्याम बिहारी जायसवाल ह ये बड़े फैसला के स्वागत करत कहिन कि ये हमर राज के जुवान मन बर एक बड़े उपलाब्धि आय। एमबीबीएस सीट बढ़े ले डाक्टरी पढ़े के मउका बाढ़ी अउ जादा ले जादा लइका मन अपन राज म रहिके डॉक्टर बने के सपना ला पूरा कर सकिहें। ओमन ये सफलता के स्रेय मुख्यमंत्री विष्णु देव साय के नेतृतव अउ राज सरकार के कोसिस मन ला दिहिन। ओकर कहना हे कि सरकार के लक्छ मेडिकल पढ़ाई के बिसतार करना अउ राज म सुवास्थ सुबिधा ला अउ मजबूत बनाना हे।
सुवास्थ ब्यवस्था ला मिलही मजबूती: जानकार मन के मानना हे कि मेडिकल सीट बढ़े के फायदा सिरिफ लइका मन तक ही नइ रहिही। आघू चलके राज ला जादा पढ़े-लिखे अउ होसियार डॉक्टर मिलिहें, जेकर से सरकारी अस्पताल मन म डॉक्टर मन के कमी दूर होही। ये कदम ह छत्तीसगढ़ म चिकित्सा सिक्छा अउ सुवास्थ ब्यवस्था ला मजबूत बनाए के दिसा म एक बड़े काम आय।
