होली बर पुलिस के कड़ा पहरा: 900 जवान अउ 30 ‘बाज’ टोली तैनात, हुड़दंग करइया मन के खैर नई
Holika Dahan 2026 : भिलाई। छत्तीसगढ़ के दुर्ग जिला म होली (02 मार्च) अउ रंग-गुलाल (04 मार्च) के तिहार ला शांति अउ भाईचारा के साथ मनाय बर पुलिस ह कमर कस लिये हे। वरिष्ठ पुलिस अधीक्षक के आदेश म पूरा जिला ला 10 हिस्सा म बांट के सुरक्षा के तगड़ा इंतजाम करे गे हे, ताकि सहर ले लेके गांव तक कउनो भी गड़बड़ी झन होवय।
900 जवान अउ 73 पेट्रोलिंग पार्टी तैनात पूरा जिला म करीबन 900 पुलिस जवान मन के ड्यूटी लगाय गे हे। 73 पेट्रोलिंग गाड़ी मन लगातार गस्त मारत रहिहीं। सहर के संकरी गली अउ बस्ती मन म नजर रखे बर 30 ‘बाज’ मोटरसाइकिल टोली बनाय गे हे, जे मन कउनो भी सूचना मिलत ही फउरन ओ जगह म पहुंच जाहीं। सहर म 139 जगह म फिक्स पॉइंट अउ 25 जगह म नाकाबंदी चेकिंग पॉइंट बनाके कड़ाई ले जांच करे जाही।
नसा करके गाड़ी चलाय म होही जेल पुलिस ह साफ कहि दे हे कि तिहार के नाम म हुड़दंग नई सहे जाय। जउन मन नसा करके गाड़ी चलाहीं, मोटर व्हीकल एक्ट के तहत ओ मन ऊपर कड़ा कार्रवाई होही। एक गाड़ी म तीन सवारी बैठइया अउ लइका मन के गाड़ी चलाय म घलो रोक हे। अवैध दारू, नसा के सामान अउ हथियार ले जाय म सीधा जेल भेजे के तइयारी हे।
शांति समिति अउ फ्लैग मार्च होली ले पहिली सब्बो थाना-चौकी म शांति समिति के बैठक लेके समाज के प्रमुख मन ले गोठ-बात करे गे हे। आज 2 मार्च के मंझनिया 2 बजे दुर्ग-भिलाई म पुलिस के ‘फ्लैग मार्च’ निकलही, ताकि लोगन मन निडर होके तिहार मना सकंय। एसएसपी ह खुद आज मंझनिया 12 बजे कंट्रोल रूम म सब्बो जवान मन ला जरूरी निर्देश दिहीं।
दुर्ग पुलिस के अपील दुर्ग पुलिस ह सब्बो नागरिक मन ले अपील करे हे कि होली के तिहार ला संयम अउ मया-पिरित के साथ मनावंय। कउनो भी अफवाह म धियान झन देवंय। अगर कउनो भी संदेही दिखय या विवाद होवय, त तुरंते 112 या 9479192099 म फोन करके जानकारी देवंय। नियम तोड़े वाले मन ऊपर कड़ा कानूनी डंडा चलही।
