छत्तीसगढ़ म सुसासन : साय सरकार ह दीस मंजूरी, अब प्रदेश म खुलही 4 नवा उप पंजीयक कार्यालय
Chhattisgarh News : रायपुर। छत्तीसगढ़ के विष्णु देव साय सरकार ह आम जनता ला रजिस्ट्री अऊ पंजीयन के काम म सउंघ (आसान) सुविधा दे बर एक ठन बड़का फैसला लिस हे। मुख्यमंत्री ह प्रदेश के तीन जिला म 4 नवा उप पंजीयक कार्यालय (Sub-Registrar Offices) खोले बर प्रशासकीय मंजूरी दे दीस हे। ए फैसला ले अब मनखे मन ला रजिस्ट्री कराय बर जिला मुख्यालय के चक्कर नइ काटे बर परही।
ए चार ठन जगह म खुलही नवा कार्यालय: रजिस्ट्रीकरण अधिनियम-1908 के तहत नवा कार्यालय मन ला ए जगा म खोले जाही:
भखारा: जिला धमतरी
लवन: तहसील मुख्यालय, जिला बलौदाबाजार-भाटापारा
सकरी: जिला बिलासपुर
राजकिशोर नगर: जिला बिलासपुर
समय अऊ पइसा के होही बचत नवा दफ्तर खुले ले आस-पास के लोगन मन ला बड़का राहत मिलही। पहिली छोटे-मोटे पंजीयन बर दूरिहा जिला मुख्यालय जाय बर परत रहिस, जेमां बखत अऊ पइसा दूनों बरबाद होत रहिस। अब ए नवा केंद्र मन ले काम म तेजी आही अऊ जिला कार्यालय म भीड़ घलो कम होही।
सुसासन अऊ हाई-टेक सुधार मुख्यमंत्री विष्णु देव साय ह किहिस कि सरकार के लक्छ सुसासन ला मनखे मन के दुआर तक पहुंचाना हे। ओही डहर, वित्त मंत्री ओ.पी. चौधरी ह बताय हे कि ए नवा कार्यालय मन म विभाग के ’10 क्रांतिकारी सुधार’ घलो लागू होही।
पंजीयन विभाग के आधुनिक सुविधा मन:
घर बैठे रजिस्ट्री: ऑनलाइन स्लॉट बुकिंग के बेवस्था।
ऑटो डीड जनरेशन: दस्तावेज बनाय के ऑटोमैटिक सिस्टम।
स्वतः नामांतरण: रजिस्ट्री के संग च नामांतरण के प्रक्रिया सुरू हो जाही।
व्हाट्सएप अऊ डिजीलॉकर: डिजिटल दस्तावेज अऊ व्हाट्सएप ले जानकारी।
कैशलेस पेमेंट: सुरक्षित अऊ पारदर्शी भुगतान।
मंत्री ओ.पी. चौधरी ह किहिस कि बायोमेट्रिक सत्यापन अऊ ऑनलाइन सर्च जइसन सुविधा ले अब धोखाधड़ी के डर घलो खत्म हो जाही।
