आम जनता ल मिलही राहत : हाउसिंग बोर्ड के 35 कॉलोनी मन अब नगरीय निकाय ल सौंपे जाही, कैबिनेट के बैठक मा होइस बड़ फैसला
रायपुर। छत्तीसगढ़ सरकार ह हाउसिंग बोर्ड अउ रायपुर विकास प्राधिकरण (RDA) के बनाए 35 आवासीय कॉलोनी मन मा रहइया मन बर एक ठन बड़ अउ सुखघर फैसला लिस हे। मुख्यमंत्री विष्णु देव साय के अध्यक्षता मा होय कैबिनेट बैठक मा ये तय करे गे हे कि अब ये सबो कॉलोनी मन ल नगर निगम अउ नगर पालिका मन ल सौंप दिए जाही।
काबर लिस गे ये फैसला? अब तक ये कॉलोनी मन ह नगरीय निकाय मन ल नहीं सौंपे गे रिहिन, जेखर सेती उहां रहइया मन ल पानी, सड़क, सफाई अउ स्ट्रीट लाइट जैसी जरूरी सुविधा मन बर भारी दिक्कत होवत रिहिस। संग मा मनखे मन ल ‘दोहरा मार’ सहि ला परत रिहिस—एक कोती नगर निगम ल संपत्ति कर देवें अउ दूसर कोती हाउसिंग बोर्ड ल मेंटेनेंस के पइसा।
अब का होही फायदा? सरकार के ये फैसला के बाद अब कॉलोनी मन मा नगर निगम ह सुविधा मन के जिम्मेदारी उठाही। निवासियों ल अब अलग से मेंटेनेंस शुल्क नहीं दे बर पड़ही, जेखर से ओ मन के पइसा बाचही। एखर साथे उहां के बगीचा, खुला जगह अउ सार्वजनिक सुविधा मन के देख-रेख घलो अब निकाय मन के जिम्मेदारी होही।
ये फैसला ले शहरी क्षेत्र के मनखे मन के जुन्ना समस्या के समाधान हो जाही अउ उहां के व्यवस्था घलो बढ़िया हो जाही।
