ed raid raipur : रायपुर। छत्तीसगढ़ म एक बार फिर प्रवर्तन निदेशालय (ईडी) के बड़ कार्रवाई ह राजनीतिक अउ प्रशासनिक गलियारा मन म हलचल मचा दे हे। राजधानी रायपुर संग प्रदेश के कतको जिला मन म मंगनवार के दिन ईडी ह एक साथ छापा मारे के कार्रवाई सुरू करिस। बताए जात हे कि ए कार्रवाई जिला खनिज न्यास (DMF) ले जुड़े कथित घोटाला के जांच के सिलसिले म करे जात हे।

सूत्र मन के मुताबिक, ईडी के टीम ह रायपुर, दुर्ग, धमतरी, अंबिकापुर अउ महासमुंद समेत प्रदेश के अलग-अलग जगह म दबिस दे हे। पूरा प्रदेश म करीब नौ ठिकाना मन म छापा मारे के गोठ सामने आवत हे। ए कार्रवाई के बाद कतको जरूरी कागजात अउ रुपिया-पैसा के लेन-देन ले जुड़े बात मन के बाहिर आवे के संसो (संभावना) जताए जात हे।

कारोबारी शाश्वत लुणावत के घर घलो चहुँपिस ईडी

राजधानी रायपुर के वल्लभ नगर म रहने वइया कारोबारी शाश्वत लुणावत के घर म घलो ईडी के टीम ह बिहनिया ले जांच-पड़ताल सुरू कर दीस। जानकारी के मुताबिक, पांच अधिकारी मन के टीम ह कतको घंटा ले घर के भितर कागजात अउ दूसर रिकॉर्ड मन के जांच करत हे। बताए जात हे कि ए कार्रवाई DMF घोटाला के मामला ले जुड़े पहलू मन के जांच बर करे जात हे।

सूत्र मन के कहना हे कि शाश्वत लुणावत ह प्रदेश के एक बड़े परिवार ले जुड़े हे अउ राज म अलग-अलग कारोबार चलाथे। ईडी के जांच सिर्फ ओकर घर तक सीमित नई हे, बल्कि ओकर ले जुड़े दूसर ठिकाना मन म घलो छापा के कार्रवाई चलत हे।

हालांकि, ईडी डहर ले अभी ए कार्रवाई ला लेके कोनो आधिकारिक जानकारी नई दिए गे हे, पर पूरा प्रदेश म चलत ए बड़ कार्रवाई ऊपर सबो मनखे मन के नजर टिके हे। अइसन माने जात हे कि जांच पूरा होए के बाद कतको बड़ खुलासा मन हो सकत हें।