देश के पहिली ‘एलपीजी एटीएम’, खाली सिलेंडर देव अउ भराए ले जाव…

First Gas Vending Machine India : गुरुग्राम। रसोइया गैस बर अब एजेंसी के चक्कर काटे अउ हफ्ता भर राह देखे के दिन लद गे। हरियाणा के गुरुग्राम (सेक्टर-33) म देश के पहिली LPG ATM वेंडिंग मशीन शुरू करे गे हे। ये मशीन ठीक वइसने काम करथे जैसे आप मन बैंक के एटीएम ले पइसा निकालथव, बस एमा पइसा के जगह भराए होय गैस सिलेंडर मिलही।

कइसे काम करही ये ‘गैस एटीएम’?
गुरुग्राम के सेंट्रल पार्क फ्लावर वैली म लगे ये मशीन ह पूरा ‘ऑटोमैटिक’ हे। ग्राहक मन ला बस अपन मोबाइल नंबर डाले बर लगही, ओखर बाद ओटीपी (OTP) ले जांच होही। यूपीआई (UPI) या कार्ड ले पइसा पटाते साथ मशीन ह तुरंत एक ठन भराए होय नवा सिलेंडर निकाल के दे देही। ये पूरा काम बस 2 मिनट म हो जाही।

24 घंटा सुविधा अउ हल्का सिलेंडर
ये एटीएम के सबले बड़े खूबी ये हे कि ये 24×7 चालू रही। मतलब अगर आधा रात के घलो आप मन के गैस सिरा जाही, त चिंता करे के बात नइ हे।

हल्का अउ सुग्घर: एमा लोहा के भारी सिलेंडर के जगह ‘कॉम्पोजिट सिलेंडर’ मिलही।

वजन के झंझट खतम: जउन सिलेंडर पहिली 30 किलो के होवत रिहिस, ये नवा वाला मात्र 15 किलो के हे।

आर-पार दिखही गैस: ये सिलेंडर मन पारदर्शी (Transparent) हें, जेकर ले आप मन बाहर ले देख सकथव कि कतेक गैस बांचे हे।

एजेंसी ला खुद मिल जाही खबर
ये मशीन म एक बार म 10 सिलेंडर रखे जा सकथे। जैसे ही सिलेंडर कम होके 2 ठन बांचही, मशीन ह अपने-आप गैस एजेंसी ला खबर भेज देही ताकि नवा स्टॉक भेज दे जाय। अभी येला प्रयोग के तौर म शुरू करे गे हे, अगर ये सफल रही त आने वाला समय म हमर छत्तीसगढ़ अउ दूसर बड़े सहर मन म घलो अइसने गैस एटीएम देखे बर मिल सकथे।