डिप्टी CM के कड़ा निर्देश: ओवरब्रिज निर्माण म लेट-लतीफी करे म ठेकेदार ला नोटिस
Chhattisgarh Overbridge Delay Construction : रायपुर। डिप्टी सीएम अउ लोक निर्माण मंत्री अरुण साव के निर्देश म विभाग ह रेलवे ओवरब्रिज बनाए के काम म ढील दे अउ लेट-लतीफी करे बर ठेकेदार ला नोटिस थमा दे हे. उप मुख्यमंत्री साव ह अपन बस्तर परवास के बेरा 6 जून के राष्ट्रीय राजमार्ग-30 म केशलूर-जगदलपुर रद्दा म किरंदुल-विशाखापट्टनम रेलवे लाइन के ऊपर बनत फोरलेन रेलवे ओवरब्रिज के निरिक्षण करे रिहिन.
ओमन निरिक्षण के बेरा काम के पिछड़े अउ लेट-लतीफी होए म ठेकेदार अउ अधिकारी मन ला बनेच फटकार लगाईन. संग म अनुबंध (एग्रीमेंट) के हिसाब से काम म तेजी नहीं आए बर गहिर नाराजगी जतावत ठेकेदार ला नोटिस जारी करे के निर्देश दे रिहिन. बस्तर जिला म केशलूर के तीर 69 करोड़ 36 लाख रुपिया के लागत से ये रेलवे ओवरब्रिज के निर्माण करे जात हे.
लोक निर्माण विभाग के राष्ट्रीय राजमार्ग परिक्षेत्र के मुख्य अभियंता ह निर्माण एजेंसी मेसर्स अशोक कुमार मित्तल ला जारी नोटिस म कहे हें कि साइट मिले के बाद घलो मैन-पॉवर, मटेरियल अउ मशीनरी के खराब बेवस्था के सेती अलग-अलग चरन म निर्माण के तय समय म लच्छे ला पूरा नहीं करे जा सकीस.
काम के जगह म काम के रफतार मंजूर करे गए निर्माण कार्यक्रम से बनेच पाछू चलत हे अउ तय करे गए माइलस्टोन्स (महत्वपूर्ण पड़ावों) के हिसाब से नहीं हे. विभाग कोति ले लगातार काम के समीक्षा करके तेजी लाऐ बर बार-बार कहे अउ नोटिस जारी करे के बाद घलो काम के गती असंतोषजनक हे.
विभाग ह ठेकेदार ला जारी नोटिस म कहे हे कि उप मुख्यमंत्री कोति ले बीते 6 जून के साइट के निरिक्षण के बेरा काम के एतका धीमा गती म गंभीर चिंता जताए गे रिहिस. ओमन अनुबंध के नियम के हिसाब से ठेकेदार के खिलाफ तुरंते कारबाही करे के निर्देश दे रिहिन.
डिप्टी सीएम के निर्देश म मुख्य अभियंता ह ठेकेदार ला नोटिस जारी करके तुरंते पूरा मैन-पॉवर, मशीनरी, सामान अउ दूसर जरूरी संसाधन जुटाके काम म तेजी लाऐ अउ प्रोजेक्ट ला समय म पूरा करे बर तय लच्छे ला हासिल करे के निर्देश दे हें. काम के रफतार म सुधार नहीं आए म विभाग कोति ले अनुबंध के नियम के तहत कड़ा एक्शन (कारबाही) करे जाही.
